Этнограф-сибировед, суруйааччы уонна публицист, Саха сиригэр 1880 — 1892 сылларга сыылкаҕа олорбут Вацлав Серошевскай «Якуты» кинигэни 1896 сыллаахха суруйбута. Кини сахалар олохторун туһунан элбэх чинчийии ыыппыта. Тохсунньу 24 күнүгэр Дьокуускайга кинигэ иккис туомун билиһиннэрдилэр, суруйар СИА.
«Якуты» иккис туомугар суруйуулар, бэлиэтээһиннэр, остуоруйалар киирдилэр, бастакы туому ситэрэн биэрэр матырыйааллар. Кинигэ сүрүнүгэр Вацлав Серошевскай 1901 сыллаахха суруйбут суруга ылылынна. Чинчийээччи оччолорго кинигэтин салгыыта тахсарын былааннаабыт, ити эрээри баҕа санаата олоххо киирбэтэх.
«Иккис туом наука дьонун эрэ буолбакка, Саха сирин олохтоохторун, ол иһигэр устудьуоннар, ыччат болҕомтотун тардыаҕа. Вацлав Серошевскай бэйэтэ суруйбутунан, саҥа наука арыйыыларыгар төрүөт буолуо», — диэн эттэ бырабыыталыстыба бэрэссэдээтэлин солбуйааччы Сергей Местников.
Тираһа 500 экземпляр, страницата — 320. Нуучча географическай уопсастыбатын гранын үбүлээһининэн таҕыста.
Хаартыска: Мария Васильева,
СИА
