Үс сыллаах Саха сирин бюджетын бырайыагар бюджет эйгэтин үлэһиттэрин хамнастарын индексациялааһыҥҥа, МРОТын үрдэтиигэ улахан үп көрүллэр, ону тэҥэ, былааннааһын быһыытынан, нолуок дохуота быдан үрдүк буолуоҕа. Ити барыта регион экономическай туруктааҕын ыйар, бэлиэтээтэ Саха сирин үбүн экс-миниистирэ, финграмотность компетенцияларын өрөспүүбүлүкэтээҕи киинин кылаабынай эксперта Валерий Жондоров.
«Өрөспүүбүлүкэ үс сыллаах кэмҥэ судаарыстыбаннайй бюджетын туһунан сокуон бастакы ааҕыыга бэриллибит бырайыагар 2026 сылга госбюджет дохуотун уопсай кээмэйэ 309 768,2 мөл.солк., ол иһигэр нолуок дохуота — 212 800,1 мөл. солк., нолуога суох дохуот — 11 826,1 мөл. солк. буолуоҕа. Онуоха нолуок дохуотун билгэтэ уопсайынан, 2025 сылга холоотоххо, 10,1 млрд солк. үрдүк, ити өрөспүүбүлүкэ госбюджетын ороскуотун үөскэтиигэ базовай кыахтары биэрэр экономикабыт туруктаах буоларын көрдөрөр», — диэн Валерий Жондоров быһаарда.
Кини 2026 сылга судаарыстыбаннай бюджет ороскуотун уопсай кээмэйэ 317 339,7 мөл. солк. таһымынан быһаарыллыбытын бэлиэтээтэ. Бу кээмэй 2025 сыллааҕы бюджет бастакы ааҕыытыгар бигэргэтиллибит ороскуот көрдөрүүтүн 23 296,8 мөл.солк. куоһарар.
«Онуоха ороскуокка наадыйыы балачча үрдүк, федеральнай бюджеттан төлөбүрэ суох киириилэри чуолкайдаатахха иккис ааҕыыга дохуот параметрдарын үрдэтэн, сороҕун сабыллыаҕа. Саамай суолталааҕынан 2026 сылга «тус сыаллаах» уонна бюджет эйгэтин үлэһиттэрин атын категорияларын хамнастарын индексациялааһыҥҥа быһаарыылары олоххо киллэриигэ, МРОТу 20% үрдэтиигэ 36 млрд солк.кээмэйдээх эбии сүдү үп көрүллэрэ дии саныыбын», — диэн Валерий Жондоров эбэн эттэ.
Эрдэ ЯСИА Саха сиригэр социальнай өйөбүлгэ 2026 сылга 130 млрд солк. тахса солкуобайы ыытыахтара диэн иһитиннэрдэ.
This post was published on 17.10.2025 18:19 18:19