Саха сириттэн Валерий Ергалов Сербиятааҕы самбоҕа Европа чемпионатыгар 58 кг диэри бастаата. Финалга Армения спортсменын «болевой» ньыманан суулларда.
Ергалов СИА кэрэспэдьиэнигэр маннык кэпсээтэ:
— Бу норуоттар ардыларынааҕы турнирга бастакы уопутум. Россияны уонна Саха сирин үчүгэйдик көмүскээбиппинэн үөрэбин. Чемпионат үрдүк таһымҥа ааста. Спортсменнар бастыҥ техникалаахтарын көрдөрдүлэр. Кыайыыга дьулуурдааҕым, кыһыл көмүс мэтээл туһугар үлэлээтим.
Чемпионат балаҕан ыйын 15 күнүгэр Нови-Садка стартаабыта. Барыта 51 комплект мэтээл оонньонно.
