Саха сиригэр Бүтүн Россиятааҕы нэһилиэнньэ биэрэпиһэ салҕанан барар. Түмүккэ региоҥҥа демографическай, социальнай уонна экономическай дааннайдар чуолкайданыахтара, СИА-ҕа Ил Дархан уонна бырабыыталыстыба пресс-сулууспата иһитиннэрдэ.
Официальнай статистиканан, өрөспүүбүлүкэҕэ демографическай балаһыанньа тупсар. 2020 сылга 13 097 оҕо төрөөтө, 2019 сылга – 12 817 оҕо. Мантан оҕо 40 бырыһыана үс уонна онтон элбэх оҕолоох дьиэ кэргэттэргэ күн сирин көрдө.
24 муниципальнай тэриллиигэ төрөөһүн эбиллэр. Саамай элбэх Дьокуускайга – 4 586, Мииринэйгэ – 727, Нерюнгри – 703, Мэҥэ Хаҥалас – 572, Бүлүү – 436, Хаҥалас – 423, Ньурба – 413, Сунтаар – 391, Ленскэй – 389, Алдан – 387, Нам – 381, Үөһээ Бүлүү – 374.
Уол оҕо төрөөһүнэ элбэх. 2020 сылга 6 658 уол уонна 6 439 кыыс, 2019 сылга – 6 557 уол, 6 260 кыыс төрөөбүт.
Төрөөһүн өлүүттэн элбэх. «Естественный прирост населения» — 4 016 киһи.
Саахса тэрилтэтэ 2021 сыл 9 ыйын түмүгүнэн иһитиннэрбитинэн, Саха сиригэр 9 001 оҕо төрөөбүт: кыыһа 4 441 уонна уола 4 560.
Саамай тарҕаммыт кыыс аата: София, Алиса, Милана, Ева, Виктория, Амелия, Мия, Аделина. Ураты ааттар – Джульетта, Джулия, Жозефина, Луна, Офелия, Сакура.
Саамай тарҕаммыт уол аата: Артем, Александр, Тимур, Максим, Даниил (Данил), Марк, Артур, Михаил, Лев, Иван. Ураты ааттар: Андерсон, Антуан, Билл, Атаман, Гектор, Космос, Лео, Марс, Оливер, Оскар, Султан.
Саамай тарҕаммыт сахалыы ааттар: Куннэй, Дайаана, Сандаара, Сайнаара, Мичийэ; Эрсан, Эрхаан (Эрхан), Айтал, Эркин, Арчын, Дархан, Эрчим.
Иккилии ааттаныы баар: Анна – Алгыстаана, Дарина-Дайаана, Елизавета – Туйаарыма, Милана-Айыллаана, Мишель-Кыыма, Нарыйаана- Мия, Афанасий-Уран, Давид-Кундул, Дамир-Хаан, Тимур-Сатал, Николай-Сэргэ.
Саха сиригэр үрдүк көрдөрүүнү «Демография» национальнай бырайыакка олоҕуран ситиһилиннэ.
Хаартыска: Мария Васильева, СИА
This post was published on 04.11.2021 13:01 13:01