Бүгүн Уус Алдан улууһун баһылыга Василий Аммосов буоксаҕа Арассыыйа спордун маастарын, Арассыыйа чемпионатын үрүҥ көмүс призерун Павел Васильевы, кини аҕатын Михаил Васильевы уонна тренерин Илья Иванову кытта көрүстэ.
Көрсүһүүгэ буокса спордугар инники соруктары, былааннары кэпсэттилэр, Павелга кэс тыллар ананнылар. Итиэннэ баһылык Василий Иванович улуус спордун, чуолаан буокса көрүҥүн сайыннарыыга өҥөлөрүн, Россия чемпионатыгар үрдүк ситиһиилэрин иһин Павелга, тренеригэр Илья Петровичка харчынан сертификаттары туттарда.
Павел Васильев уонна Илья Иванов маннык үрдүк ситиһиилэри дабайалларыгар дьиэ кэргэнтэн саҕалаан күүс-көмө, өйөбүл буолалларыгар улуус дьаһалтатыгар уонна күрэхтэһээччини бэлэмниир, күрэхтэһиигэ тэрийэр олус түбүктээх үлэҕэ улахан көмөлөөх улуус буоксаҕа федерациятын салайааччытыгар Владислав Гуляевка улахан махталлаахтар. Улууска буокса федерацията бу сылга саҥа тэриллэн үлэлээн эрэр уонна үлэтин тэтимнээхтик саҕалаабытын ситиһиилэр туоһулууллар.
Ольга Шепелева, Мүрү Саһарҕата
This post was published on 16.10.2024 16:06 16:06