Уус Алдан улууһугар халаан уутун содулун кылгас болдьоххо чөлүгэр түһэриэхтээхпит,-диэтэ командировка түмүгэр өрөспүүбүлүкэ бастакы вице-премьерэ Дмитрий Садовников, бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
Уус Алдан оройуонугар уу таһыма үрдээһиниттэн Суотту нэһилиэгин Оҕуруоттааҕа, Хоноҕоро, Арыы-Тиит, Түүлээх дэриэбинэлэрэ ууга былдьаннылар. Олохтоох нэһилиэнньэ эмсэҕэлээбэтэ, ол гынан баран 3-тэн тахса км усталаах суол алдьанна. Нэһилиэктэргэ ЧС режимэ биллэриллибитэ. Анал хамыыһыйалар суһаллык хоромньуну ааҕыыга бардылар. Билигин аактар оҥоһулуннулар, сыана экспертизатыгар ыытыллыахтаах смета бэлэмнэннэ.
«Алдьаммыт суол барыта тутуу сезонугар чөлүгэр түһэриллиэхтээх. Авария кэннэ чөлүгэр түһэрии үлэлэргэ үп- харчы бэриллиэҕэ. Олохтоох дьаһалта сметаны, бырайыагы оҥорон бүтэриэхтээх уонна кылгас болдьоххо докумуоннары экспертизаҕа ыытыахтаах. Оттон өрөмүөҥҥэ диэри быстах сырыыны, отсыпканы оҥоруохха наада. Бөһүөлэктэр икки ардыларыгар сылдьарга сиринэн суол олус наада, бачча навигация аһыллан турар кэмигэр тыын боппуруос буолар, дьон хайыы-үйэ сырыытын саҕалаан эрэр«, — диэтэ Садовников.
Барыллаан ааҕыынан, бөһүөлэк иһинээҕи уонна бөһүөлэктэр икки ардыларынааҕы суолларга хоромньу суумата 40-ча мөл. солк. буолуоҕа. Суотту, Бороҕон уонна Түүлээх нэһилиэктэригэр барыта 3395 миэтэрэ уһуннаах суол болотуната алдьаммыт.
Алдьаммыт суоллар ортолоругар Оҕуруоттаах уонна Хоноҕор нэһилиэктэрин икки ардыларыгар өрөспүүбүлүкэтээҕи «Бороҕон» суол алдьанна. Уопсай уһуна-2,2 км. Садовников ыам ыйын 31 күнүгэр кэлэ сылдьыбытыгар суол учаастактарыттан биирэ бүүс-бүтүннүү алдьаммыт этэ. Бэс ыйын 1 күнүгэр манна быстах айан тэрилиннэ. Бэдэрээтчит бэс ыйын устата өрөмүөн үлэтин бүтэрэрэ былааннанар.
Бэлиэтээн эттэххэ, уу толору туораата. Халаан кэмигэр Уус-Алдан оройуонугар быстах кэмҥэ дьону олордор пууннар тэриллибиттэрэ. Эрдэ бэлэмнэммит уу ылбат учаастактарыгар сүөһүнү, сылгыны таһаарбыттара. Эвакуационнай биригээдэлэр үлэлээтилэр, бөһүөлэктэргэ суукканы быһа дьуһуурустубалаатылар. Барыта 40 тиэхиникэ тардылынна, ол иһигэр 10 мотуордаах оҥочо.
