18 От ыйа 18.07
  • 20°
  • $ 88,09
  • 96,3

Уус Алдан кырачааннара Агния Барто айымньыларыгар ыалдьыттаатылар

12:48, 22 апреля 2016
Читайте нас на
Яндекс Новости
ЯДВ

Оҕо-аймах кутун туппут поэтесса, суруйааччы Агния Барто төрөөбүтэ 110 сылынан Уус Алдан улууһун бибилэтиэкэлэрэ сэргэх тэрээһиннэри тиһиктээхтик тэрийдилэр. Нэһилиэк ахсын араас викториналар, уруһуй куонкурустара, хоһооннору ааҕыылар, бибилэтиэкэҕэ уруоктар көхтөөхтүк салҕаннылар.


«Бибилэтиэкэлэр үлэбит үөрүйэҕин хардарыта атастаһа, сүбэнэн-аманан үлэлии олорорбут санаабытын көтөҕөр, айыах-тутуох баҕабытын күүһүрдэр. Холобур, бу күннэргэ бары Агния Бартоҕа аналлаах тэрээһиннэринэн олордубут. Найахы кырачааннарыгар «Үтүө санаа поэзиятын» нэдиэлэ устата ыыттыбыт. Оскуола бибилэтиэкэрэ Валерия Васильева алын сүһүөх кылаас үөрэнээччилэригэр кылаас чаастарын оҥордо. Оҕолор суруйааччы олоҕун, айар үлэтин билистилэр, хоһооннорун дорҕоонноохтук аахтылар, өйтөн суруйууга кытыннылар. Биһиги бибилэтиэкэбит тэрийбит «Агния Бартоҕа ыалдьыттыыбыт» викторинабытыгар, кырачааннар хоһооннорунан, ойууларынан, оонньуурдарынан таайыылары олус сөбүлээтилэр. Дьиэ кэргэнинэн көмөлөөн бэйиэт айымньыларын тылбаастааһын бүтүн нэһилиэк болҕомтотун тарта. Уруһуй да куонкуруһугар кыттааччы элбэҕэ үөртэ, астыннарда. Нэдиэлэни түмүктүү «Бэһиэлэй хоһооннор эйгэлэригэр» хоһоону ааҕыы күөн көрсүһүүтэ үс бөлөҕүнэн ыытылынна. Бастакыга — оҕо саадын иитиллээччилэрэ, иккис бөлөххө – 1-2 кылаас үөрэнээччилэрэ, үһүскэ – 3-4 кылаас оҕолоро ох курдук оҥостон кыттыбыттара күрэхтэһиини сытыырхатта», — диэн кэпсиир нэһилиэк бибилэтиэкэтин сэбиэдиссэйэ Айталина Готовцева.

Маннык сэргэх тэрээһиннэри Бороҕон «Сыккыс» (Нина Иванова), Дүпсүн (Прасковья Сивцева), Майаҕас (Ксения Кириллина), Чараҥ (Анна Пестрякова), Өспөх (Валентина Назарова), Тумул (Светлана Прудецкая) бибилэтиэкэлэрэ тэрийэннэр, оҕолорго умнуллубат үөрүүнү иҥэрдилэр.

Сардаана Баснаева

Следите за самым важным и интересным в Telegram-канале и WhatsApp-группе ЯСИА