Быстах байыаннай хомуурга хабыллан Курбуһах орто оскуолатыттан биир учуутал барбыта. Кини дьиэ кэргэнигэр туох көмө оҥоһулларын туһунан оскуола идэлээх сойууһун кэмитиэтин бэрэссэдээтэлэ Матрена Васильева маннык кэпсээтэ:
– Биһиги оскуолабыт физкультураҕа учуутала Иван Петров быстах байыаннай хомуурга хабыллан бастакылар кэккэлэригэр киирэн байыаннай эпэрээсийэҕэ кытта барда. Онон сибээстээн кини дьиэ кэргэнигэр көмө оҥорон эрэбит.
Петровтар үс оҕолоохтор, улаханнара – 10, иккис оҕо 2 кылааска үөрэнэллэр, кыралара – оҕо саадын иитиллээччитэ. Кэргэнэ Марина Курбуһахтааҕы кырдьаҕастар дьиэлэригэр бухгалтерынан үлэлиир.
Оскуола кэлэктиибэ бастакы көмөбүтүн харчынан оҥордубут. Муус ылыыта саҕаланнаҕына эр дьон уонна улахан кылаас уолаттара муус ылан биэрэхтэрэ. Дьиэ кэргэн уопсай дьиэҕэ олорор. Онон кыбаартал аайы харчынан көмө оҥорор туһунан идэлээх сойууспут кэмитиэтин мунньаҕар уураахтаатыбыт. Оҕолор Ил Дархан Ыйааҕын быһыытынан оскуолаҕа итии аһылыкка босхо чэпчэтиинэн туһаналлар.
Хаартыскаҕа Иван Петров хаҥастан бастакы.
Афанасий Сектяев, Мүрү Саһарҕата
