Даалыга үһүс саас оскуолатын алын салаата тэриллэн талба талааннаах олохтоохтор кэрэ эйгэни кэрэхсии, үүнүүнү-сайдыыны батыһа үгүс үлэни-хамнаһы ыыталлар. Ол курдук кинилэри кытта “Айар иис” түмсүү (салайааччы СӨ норуотун маастара Россия айар худуоһунньуктарын сойууһун чилиэнэ Мария Атласова, уһуйааччылар Уус Алдан улууһун норуотун маастара Галина Охлопкова, Анастасия Копырина, Зинаида Попова), “Оҕуруо умсулҕана” түмсүү (салайааччы Уус Алдан улууһун норуотун маастара Любовь Саввина, уһуйааччы Варвара Сидорова), “Кустук” изостудияттан Ксения Румянцева биир ситимнээх үлэни ыытабыт. Даалылар куратордарынан Ирина Басыгысова хаһыс да сылын ситиһиилээхтик үлэлиир.
Соторутааҕыта үһүс саас оскуолатын педагог-волонтердара Даалы мааны далбардарын үлэтин-хамнаһын билсэ-көрсө, маастар-кылаастары ыыта ыалдьыттаан кэллибит. Филиал салайааччыта Варвара Заболоцкая саҥа сырдык балаҕаныгар итии чэйдээх, толору астаах сахалыы сайаҕастык көрүстүлэр. Бу сылдьан олохтоох библиотекаҕа кинигэ бэлэхтээтибит, маастар-кылаастары ыыттыбыт, дуоһуйа кэпсэтэн, санаа атастаһан, ыллаан-туойан кэллибит. Истиҥ көрсүһүүнү тэрийбит мааны далбардарбытыгар уонна Семен Петуховка махталбытын тиэрдэбит.
Даалыга олорор элбэх оҕолоох Аина, Иван Туласыновтарга аһымал-акцияҕа кыттыһан ас-үөл биэрдибит. Оҕолор барахсаттар үөрүүлэрин үллэстэн, үтүө баҕа санаабытын анаатыбыт. Улаханнык ыалдьар дьоҥҥо кыра да болҕомто наада. Онон тустаах тэрилтэлэр – доруобуйа харыстабыла, социальнай харалта болҕомтолорун ууруохтара диэн бигэ эрэллээхпит.
Үһүс саас оскуолатын үлэтэ таһаарыылаах, ситиһиилээх буоларыгар күүс-көмө, өйөбүл буолар улуус баһылыгын солбуйааччытыгар Михаил Борисовка, Мүрү 1№-дээх орто оскуолатын дириэктэригэр Игорь Сивцевкэ уонна биһигини сылаастык, сымнаҕастык илдьэн аҕалбыт суоппарбытыгар Гаврил Жирковка махтанабыт.
Мария Павлова, Үһүс саас оскуолатын координационнай сэбиэтин чилиэнэ
