Өрөспүүбүлүкэ күнүн көрсө бүгүн Уус Алдан улууһуттан бибилэтиэкэ үлэһиттэрэ Мэҥэ Хаҥаласка Төҥүлү лициэйигэр ыалдьыттыы сылдьаллар. Бу туһунан биһиэхэ Бороҕон нэһилиэгин киин бибилэтиэкэтин сэбиэдиссэйэ Варвара Окоемова иһитиннэрдэ.
«Бүгүн биһиги улууспутуттан Бороҕон нэһилиэгин уонна оскуола бибилэтиэкэтин кэллэктииптэрин көҕүлээһиннэринэн, Төҥүлүгэ лициэй үөрэнээччилэрин кытта сэргэх көрсүһүү буола турар. Тэрээһин Өрөспүүбүлүкэ күнүгэр уонна бөдөҥ уопсастыбаннай диэйэтэл, кыраайы үөрэтээччи, Арассыыйаҕа ааспыт үйэ саҥатыгар Саха сирин туһунан киэҥник сырдаппыт Василий Никифоров-Күлүмнүүр төрөөбүтэ 150 сылыгар ананар», — диир Варвара Николаевна.
Бибилэтиэкэ үлэһиттэрэ үөрэнээччилэргэ саха саарына Күлүмнүүр олоҕун, үлэтин билиһиннэрбиттэр, викторина ыыппыттар. Билиини-көрүүнү тургутар күрэстэһиигэ оҕолор көхтөөхтүк кыттыбыттар. Эрбии тииһин курдук эгил-тэгил киирсии кэнниттэн, тохсус кылаас үөрэнээччитэ Тоня Окоемова кыайыылааҕынан тахсан үөрбүт. Мантан салгыы бибилэтиэкэлэр үлэ-хамнас былаанын билсиэхтээхтэр, санааларын атастаһыахтаахтар, кэлэр да өттүгэр бу курдук тэрээһиннэри көмөлөөн тэрийэр туһунан сэһэргэһиэхтээхтэр.
Түгэнинэн туһанан Бороҕон нэһилиэгин киин, «Сыккыс» бибилэтиэкэлэрин кэллэктииптэрэ Төҥүлү нэһилиэгин уонна оскуолатын бибилэтиэкэлэрин үлэһиттэригэр көрсүһүүнү олус истиҥник тэрийбиттэригэр махтаналлар.
