Улуустааҕы тыа хаһаайыстыбатын управлениетыттан иһитиннэрбиттэринэн от ыйын 27 күнүнээҕи туругунан ходуһаҕа 1695 киһи хоннохтоохтук оттуу сылдьар, диэн Мүрү Саһарҕатын телеграм-ханаала суруйар.
Барыта 1032 тиэхиньикэлээх 696 звено үлэлиир. Ол иһиттэн 389-һа толору механизированнай, 288-һа механизированнай аҥаардаах, 1 көлө-илии, 18-һа илии звенолара.
Охсуллубут ходуһа иэнэ 10987,8 га буолбут. Оттон кэбиһии 9077 туонна буолла диэн иһитиннэрэллэр. Ити тиэрдиллибит былаан 27,11%-гар тэҥнэһэр.
Былырыыҥҥы дьылы кытта тэҥнээтэххэ, 2022 сыл от ыйын 28 күнүгэр улуус ходуһаларыгар 1669 киһи оттуу сылдьара. Барыта 699 звено оттообут. Онно 925 тиэхиньикэлээхтэр эбит. Охсуу иэнэ 11248,4 га буолбут.Барыта 7521,9 туонна от кэбиһиллибит. Ити былаан 25,07%-гар тэҥнэспит.
Атырдьах ыйыттан дьылбыт күһүн диэки салаллан барыа. Ол аата күһүҥҥү ардахтар кэмнэрэ кэлэр. Саамай чугастара атырдьах ыйын 2 күнүгэр Ылдьыын ардаҕа. Онон күнү-дьылы таба туһанан оттуур эрэйиллэр.
Афанасий Сектяев
This post was published on 27.07.2023 15:03 15:03