Быйыл хаһааҥҥытааҕар даҕаны улаханнык халаантан эмсэҕэлээбит Абый, Муома, Өймөкөөн улуустарыгар оскуолалар саҥа үөрэх дьылыгар төһө бэлэмнэрий диэн олохтоохтор долгуйаллар. Хомойуох иһин, атырдьах ыйын ортотугар Өймөкөөҥҥө уу таһыма эмиэ үрдээн, суол-иис алдьанна, онон быыһыыр сулууспа үлэһиттэрэ суһал дьаһаллары ыллылар, суруйда Саха парламент саайт.
Үөрэх уонна билим министиэристибэтэ халаан уутун содулун туоратар Суһал ыстаабы кытары бииргэ үлэлэстэ. Бастатан туран, оҕолору эвакуациялаатылар, ууга барбыт дьиэлэртэн кураанах сиргэ тиэртилэр. Онон Өймөкөөн улууһуттан Дьокуускай куоракка 36 оҕо, Абый улууһуттан 7 оҕо кэлбитэ, Муома улууһугар дьиэлэр ууга барбатахтара эрээри, тыа хаһаайыстыбата күүскэ эмсэҕэлээтэ. Сайыҥҥы сынньалаҥ кииннэригэр ууга барбыт улуустартан 40-ча оҕо сынньанна.
Оттон үөрэх эбийиэктэрин ылан көрдөххө, Өймөкөөҥҥө уу Сордоҥноох оскуолатын кирилиэһигэр диэри тиийбитэ, дьиэ эмсэҕэлээбэккэ хаалла эрээри, муоста анныгар уу син биир киирбит, онон муостаны арыйан, куурдубуттар, ууну оботторбуттар.
Абый улууһун Кэбэргэнэ нэһилиэгэр уу оскуола харааһын ылбыт, онно оҕолору таһар тырааныспар турар эбит, тутуу матырыйаалын сакаастаан, ол харааһы чөлүгэр түһэриэхтээхтэр. Атын үөрэх эбийиэктэрэ эмсэҕэлээбэтэх буоланнар, оҕолор оскуолаҕа кэлэн, уу хаһан түһэрин кэтэстилэр. Быйыл оскуоланы бүтэрэн үөрэххэ киирэр оҕолорго, устудьуоннарга тустаах көмө оҥоһулунна.
This post was published on 04.09.2025 15:05 15:05