Тумат нэһилиэгин олохтоохторугар эт-хаан өттүнэн чэбдик буоларга, чөл олоҕу тутуһарга анаан спортивнай былаһаакка уонна Аан аартык өрөгөйдөөх аһыллыылара буоллулар. Дьон үөрүүтэ улахан.
Усуйаана Туматын олохтоохторо саҥа спортивнай былаһаакка арыллыытыгар үөрэн туран кытыннылар. Олохтоох дьаһалта баһылыга Василий Лебедев нэһилиэк сайдыытыгар кылааттарын киллэрбиттэргэ махтал суруктары туттарда, ону тэҥэ Елизавета Гороховаҕа, Маркел Слепцовка, Марфа Слепцоваҕа олоххо көхтөөх сыһыаннарын туоһулуур мэтээллэри туттартаата.
«Түмсүү» култуура дьиэтин дириэктэрэ Андриан Горохов, эдэр ыччаттар ааттарыттан Владимир Барабанскай тыл эттилэр. Кинилэр бу олорор түөлбэлэригэр кэскиллээх дьыала тэриллибитигэр махталларын биллэрдилэр.
Алгыстаах истиҥ тыл кэнниттэн, кыһыл лиэнтэни үөрүүлээхтик быһан, туматтар күргүөмүнэн саҥа эбийиэккэ атыллаан киирдилэр.
Үөрүүлээх-өрөгөйдөөх быһыыга-майгыга оскуола оҕолоро, нэһилиэк актыбыыстара, култуура үлэһиттэрэ кыттыылаах эрчимнээх үҥкүүлэр, ылбаҕай ырыалар толорулуннулар, диэн суруйда http://заря-яны.рф сайтыгар
This post was published on 10.09.2021 16:37 16:37