Күн бүгүн өрөспүүбүлүкэҕэ 2 024 успуорт эбийиэгэ, ол иһигэр 893 успуорт саалата, 54 харбыыр бассейн, 636 успуорт былаһаакката, хайыһар 22 баазата, сабыылаах, оҥоһуу муустаах 6 эбийиэк, успуорт ытар көрүҥнэригэр 31 тутуу, 24 стадион, 358 успуорт атын эбийиэгэ баар. Онон успуордунан дьарыктанарга, эти-сиини чэбдигирдэргэ бэрт табыгастаах усулуобуйа тэриллэр.
Саха Сиригэр успуорт 110 көрүҥэ сайдар, анал аккредитациялаах, успуорт араас көрүҥүн 73 федерацията үлэлиир. Ити федерациялар успуорду киэҥник сайыннарарга, маассабайтан саҕалаан идэтийбит күрэхтэһиилэри тэрийэргэ, спортсменнары өйүүргэ, тириэнньэрдэри, судьуйалары бэлэмнииргэ, успуорт эйгэтин интэриэһин туруорсарга үлэлэһэллэр.
Улуустарга саҥа эбийиэктэри киллэрии, олохтоохтор эти-сиини дьарыктыылларын көҕүлүүр үлэ утумнаахтык ыытыллар. Ааспыт сылга туох үлэ ыытыллыбытын билиһиннэрдэххэ, “Биисинэс-спринт (мин успуорду талабын)” федеральнай бырайыак чэрчитинэн Таатта улууһун Чөркөөх нэһилиэгэр успуорт модульнай саалата, Бүлүү куоратыгар “өйдөөх” успуорт былаһаакката тэрилиннэ.
“Тыа сиригэр сири-уоту биир кэлимник сайыннарыы” өрөспүүбүлүкэ судаарыстыбаннай бырагырааматын чэрчитинэн Сунтаарга бассейн – успуорт комплексын бастакы уочарата үлэҕэ киирдэ. “Саха өрөспүүбүлүкэтигэр физическэй култуураны сайыннарыы” бырагырааманан Таатта улууһугар Ытык Күөлгэ элбэх хайысхалаах успуорт-чэбдигирии киинэ, 1000 миэстэлээх стадион, Дьокуускай куоракка “Спортивнай” түөлбэҕэ успуорт элбэх хайысхалаах киинэ тутулунна.
“Физическэй култуураны уонна маассабай успуорду сайыннарыы” федеральнай бырайыак чэрчитинэн 2025 сылга Сунтаарга А.И. Иванов аатынан Олимпийскай эрэл оскуолатын успуорт киинин хапытаалынай өрөмүөнэ ыытылынна.
This post was published on 18.03.2026 13:01 13:01