Саха Өрөспүүбүлүкэтин Суруйааччыларын сойууһун бэрэссэдээтэлэ Иван Мигалкин, «Чолбон» сурунаал сүрүн эрэдээктэрэ Данил Макеев, «Саха сирэ» хаһыат «Саха ыала» сыһыарыытын суруналыыһа Надежда Егорова, «Чолбон» сурунаал кириитикэҕэ уонна библиографияҕа салаатын эрэдээктэрэ Иван Осипов-Уйбаан Ойуур уонна А.С. Пушкин аатынан Национальнай библиотека Лира Черова Егор Кычкин аатынан Матта орто оскуолатыгар ыҥырыылаах ыалдьыт буоллулар.
Дириэктэр Антонина Находкина: «Билиҥҥи уустук кэмҥэ уран тыл маастардара бэйэҕит айымньыларгытынан дьону үөрдэ сылдьаргытыгар махтанабын. Эһиги биһиги оҕолорбутугар кэтэһиилээх ыалдьыт буолаҕыт. Айар үлэҕитин билиһиннэрбиккитигэр, ыйытыыларга эппиэттээбиккитигэр, быһааран биэрбиккитигэр, кинигэҕитин, диискэҕитин бэлэхтээбиккитигэр махтанабын», — диэтэ.
Айар куттаахтар салгыы кулуупка олохтоох айар түмсүү чилиэннэрин уонна олохтоохторун кытта атах тэпсэн олорон сэлэстилэр, саха тыла, литература, «Чолбон» сурунаал билиҥҥи туругун уонна айар үлэ уустук ньымаларын кытта билиһиннэрдилэр, айар түмсүү чилиэннэригэр сүбэ-ама биэрдилэр, инники былааннарын туһунан кэпсээтилэр, ыйытыыларга толору эппиэттэри биэрдилэр, саҥа хоһооннорун ааҕан иһитиннэрдилэр.
