Улуустарга, киин куорат уокуруктарыгар коронавирустан быһыыны ылыыга бэлэмнэнии саҕаланна. Улуустар, нэһилиэктэр баһылыктара быһыыны ылар сирдэри бэлэмниэхтэрэ, уочараты үөскэппэт туһуттан быһыыны ылар дьону испииһэктиэхтэрэ, бөдөҥ тэрилтэлэргэ мэдиссиинэ үлэһиттэрэ тиийэллэрин тэрийиэхтэрэ. Сорудаҕы Ил Дархан бүгүн улуус баһылыктарын кытары мунньахха туруорда.
Айсен Николаев Саха сиригэр сотору кэминэн эбии 70 тыһ коронавирустан вакцина кэлиэн, сыл бастакы кыбаарталыгар нэһилиэнньэни быһыынан маассабайдык хабар сорук турарын эттэ. Маныаха быһыы ылар сири бэлэмнээһин, быһыыны ылааччылары испииһэктээһин, тэрилтэлэргэ баран быһыы биэрии, волонтердар көмөлөрүнэн туһаныы — улуус баһылыктарын соруктара.
Маны таһынан, Ил Дархан ыарыыны хонтуруолга тутар сыалтан уоппускаттан тахсар дьону тэйиччиттэн үлэҕэ көһөрөрү, харыстанар миэрэлэри толору туһанары, үлэлиир сири, уопсастыбаннай тырааныспары дезинфекциялыыры, ыарыы сибикилээх оҕолору оскуолаҕа кэлэн үөрэнэллэрин бобору санатта.
This post was published on 12.01.2021 17:01 17:01