Олорор куоратыҥ, эбэтэр бөһүөлэгиҥ тас көстүүтүн тупсарарга, уопсастыбаннай эйгэни тэрийэргэ, уу турбатын киллэрэргэ о.д.а. үлэни ыытарга уопсастыбаннай инфраструктураны тупсарар бырайыактары кыттыгас үбүлүүр олохтоох көҕүлээһиннэри өйүүр бырагыраама (ППМИ) диэн баарын билигин үгүстэр билэллэр, суруйда Саха парламент саайт.
Куорат уонна Аартыка улуустарын олохтоохторо куонкуруска кытталларыгар табыгастаах усулуобуйаны тэрийэн, «үс түннүк» оҥоһулунна. Бастакытынан, 10 000-тан аҕыйах нэһилиэнньэлээх муниципальнай тэриллиилэр, иккиһинэн, 10 000-тан элбэх нэһилиэнньэлээх куораттар, куорат уокуруктара, үсүһүнэн, Аартыка улуустара.
Куонкуруска кыайбыт дьоҥҥо судаарыстыбаннай бүддьүөттэн көрүллэр субсидия ити үс бөлөхтөрүнэн 70 %, 10 %, 20 % бэриллэр. Тыа сирин уонна куорат олохтоохторун биир бырайыактарыгар бэриллэр субсидия кээмэйэ 2023 с. үрдэтиллэн, 2 мөл. солк. тиийдэ. Итиннэ олоҕуран, тыа сиригэр, муниципальнай тэриллиилэргэ, куоракка биир бырайыакка 2 мөл. солк., куорат уокуругар 3 мөл. солк. субсидия харчыта көрүллэр. Бырайыак биир сыл иһигэр оҥоһуллан, олоххо киириэхтээх.
Өспүүбүлүкэтээҕи казначейство нэһилиэнньэ көҕүлээһининэн бүддьүөтү оҥорууга салаатын начаалынньыга Светлана Колодезникова этэринэн, бу бырагыраамаҕа 371 нэһилиэк кытынна. Нэһилиэнньэни кытта көрсөр мунньахха уопсайа 1726 этии көрүлүннэ, онтон 463 бырайыак куоластааһын быһыытынан талылынна. Олохтоохтор мунньахха 3-4 этии киирбититтэн биири талбыттара. Сайаапка 2024 с. алтынньы 21 күнүттэн сэтинньи 19 күнүгэр диэри тутуллубута. Куонкуруска киирбит 463 бырайыак сыаната холбоон, 1332,0 мөл. солк. диэн ааҕыллыбыта, онтон өрөспүүбүлүкэ бүддьүөтэ 910,7 мөл. солк., олохтоох бүддьүөт 285,6 мөл. солк., нэһилиэнньэ 40,8 мөл. солк., үбүлээччилэр 94,9 мөл. солк. харчыны укпуттара.
Киирбит сайаапкалары ырытан көрдөххө, суолу оҥорууга 75, маассабай сынньалаҥы тэрийэргэ 72, уунан хааччыйыы боппуруоһун быһаарарга 38, уулуссалары сырдатарга 37, уотунан, гааһынан, сылааһынан хааччыйыыга 25 о.д.а. хайысхалаах бырайыактар киирбиттэр.
This post was published on 29.08.2025 18:23 18:23