Улахан Аан модельнай библиотекатыгар үгэскэ кубулуйбут «Саха төрүт аһа-үөлэ» диэн библио-кухня буолла.
Сыл аайы 5 кылаас оҕолоругар төрөөбүт тыл, сурук-бичик күнүгэр «Көмүлүөк» түмсүү төрүт аспыт туһатын туһунан кэпсиир уонна астаан, оҥорон көрдөр. Бүгүн тоҥ күөрчэх, күөрчэх оҥорорго уонна Өлүөхүмэлии алаадьы буһарарга үөрэттилэр.
Сахалар төрүт аспыт туһунан бэтэрээн учуутал Кононова Зоя Афанасьевна билиһиннэрдэ. Оҕолор үрүҥ ас арааһын бэркэ билэллэрин көрдөрдүлэр. Римма Еремеевна Трофимова күөрчэх ытыйтарда уонна тоҥ күөрчэх оҥоттордо. Бэйэтэ үүннэрбит малинатынан тоҥ күөрчэҕи киэргэттэрдэ.
Изольда Семеновна Лукина Өлүөхүмэлии алаадьы буһарарга үөрэттэ. Оҕолор ураты алаадьыны бэйэлэрэ буһардылар. Түмүккэ бэйэлэрэ оҥорбут уонна астаабыт астарын минньигэстик аһаан, элбэҕи билэн, үөрэн-көтөн тарҕастылар.
Ааптар: Александра Алексеева
