Киин куорат Набережнай түөлбэтиттэн норуот дьокутаата Антонина Григорьева Аартыка улуустарыгар эрэ буолбакка, бэл, Дьокуускай куоракка учууталлар тиийбэттэрин туһунан Губинскай уокурук олохтоохторугар ыытыллыбыт отчуот кэмигэр иһитиннэрдэ. Киһи сөҕүөх аҕыйах оҕону үөрэтэр учууталлар хамнастара үрдүк, оттон элбэх оҕолоох улахан оскуолаҕа хамнас тоҕо эрэ кырата бэлиэтэнэр.
Губинскай уокурукка «Светик-семицветик», «Сардаана» уһуйааннар, «Золотая рыбка», «Сказка», «Кораблик» оҕо саада холбоһон, биир үөрэх киинэ буоллулар.
— Саҥа сокуон быһыытынан, үөрэхтэрин саҥа бүтэрбит эдэр педагогтар, ол иһигэр, логопедтар куоракка 100 000 солк., тыа сиригэр, Аартыка улуустарыгар 200 000 солк. биир кэмнээх көмө харчыны ылыахтара. Маннык дьаһал аан бастаан оҥоһуллар, атын эрэгийиэннэргэ итинник көмө суох. Подьемнай харчыта эмиэ улаатта, настаабынньыктарга хамнас төлөнүө, педагогтар чиэстэрин сокуонунан көмүскүөхтэрэ. Үөрэх министиэристибэтин иһинэн педагогтар чиэстэрин көмүскүүр хамыыһыйа тэрилиннэ, — диэтэ Антонина Григорьева.
Кини оскуолалары медпууннарынан хааччыйыы билиҥҥитэ ситэтэ суоҕун, оҕолорго мэдиссиинискэй көмөнү оҥоруу, кыраадыстаах утах атыытын хааччахтааһын туһунан билиһиннэрдэ. Куоракка күн бүгүн итирдэр утаҕы атыылыыр 82 кафе (наливайка) баар, сокуон этэринэн, хаһаайын 2027 с. диэри лиссиэнсийэлээх түгэнигэр кинилэри тута сабар бырааптара суох эбит. Өскөтүн итирдэр утаҕы атыылыыр кафе дьон олорор дьиэтиттэн чугас турар түгэнигэр кинилэри бэрээдэктиир үлэ салҕаныа.
Дьокуускайдааҕы Уу тырааныспарын үнүстүүтүн устудьуоннарыгар суол нөҥүө уопсай дьиэни тутарга хаарбах мас дьиэлэри көтүрүөхтээхтэр эрээри, сир федеральнай, эргэ мас дьиэлэр куорат хаһаайыстыбатыгар киирэллэр. Онон бырабыыталыстыба бу боппуруоһу Москубаны кытта быһаарыахтаах.
This post was published on 02.02.2026 13:08 13:08