Саха сирин бастыҥ учууталларыгар бириэмийэ ананна. Россияҕа педагог уонна наставник сылыгар наҕараада ылааччы ахсаана дойду үрдүнэн 1000-тан 1250-ҥа диэри улаатта.
Дойду бастыҥ учууталларын иһигэр Саха сирин тоҕус улууһуттан уонна Дьокуускай куораттан 12 педагог киирдэ. Ол туһунан регион салалтатын пресс-сулууспата иһитиннэрдэ.
Ил Дархан Айсен Николаев эппитинэн, үөрэх эйгэтин сүрүн соругунан — педагогтар идэлэрин таһымын улаатыыта, аныгы ньымалары, үөрэтии инструментарийын уонна бары таһымҥа иитиини киллэрии.
Кыайыылаахтар ааттара:
нуучча тылын уонна литературатын учуутала, Сунтаар политехническай лицей-интерната, Туйаара Алексеева,
биология учуутала, Таатта улууһа, Ытык Күөл №1-дээх оскуолата, Равелла Пинигина-Сосина,
нуучча тылын уонна литературатын учуутала, Дьокуускай №7-дээх оскуолата, Надежда Шестакова,
саха тылын уонна литературатын учуутала, Өлүөхүмэ улууһа, Абаҕа, Раиса Уйгурова,
физика учуутала, Мииринэй №19-дээх оскуолата, Дарья Криволапова,
география учуутала, Нерюнгри №1-дээх гимназията, Марианна Кушнир,
учуутал, Бүлүү №3-дээх оскуолата, Екатерина Комарова,
химия учуутала, Дьокуускай куораттааҕы лицей, Туйаара Жиркова,
начаалынай кылаас учуутала, Чурапчы, Лена Слепцова,
математика учуутала, Нерюнгри №24-дээх информационнай-технологическай лицей, Инесса Шредер,
начаалынай кылаас учуутала, Горнай улууһа, Бэрдьигэстээх оскуолата, Ульяна Колесова,
нуучча тылын уонна литературатын учуутала, Үөһээ Бүлүү, Боотулуу оскуолата, Оксана Семенова.
Куонкуруска административнай ноҕурууската суох, үс сылтан итэҕэһэ суох ыстаастаахтар кытыннылар. Талыы кэмигэр үөрэтэр предметигэр бэйэ методическай оҥоруулара, үөрэнээччилэрин ситиһиилэрэ, үөрэҕи таһынан үлэтэ уонна да атын критерийдар учуоттаннылар.
200 тыһ солк бириэмийэ учуутал күнүн көрсө туттарыллыаҕа.
