Саха тыйаатырыгар бу күннэргэ М.С.Щепкин аатынан Үрдүкү театральнай училищены (институту) бүтэрбит алтыс көлүөнэ саха устуудьуйатын оҕолоро Ж-Б Мольер «Дон Жуан или каменный пир» айымньытынан испэктээги туруордулар.
Испэктээк нууччалыы, сахалыы икки тылынан барда. Сүрүн оруолу Дон Жуаны Уус-Алдан ыччата Петр Домотов толордо.
Толору көрөөччүлээх саала испэктээк устатын тухары айымньы дьоруойдарын кытта тэҥҥэ күлсэ, үөрэ, сороҕор сүөм түһэ олордо.
Испэктээк бүппүтүн кэнниттэн СӨ Бырабыыталыстыбатын бэрэссэдээтэлин солбуйааччы С.В. Местников эдэр артыыстары үөрэхтэрин түмүктээн кэлбиттэринэн эҕэрдэлээн баран, Щепкин аатынан училище профессорыгар, сыанаҕа саҥатыгар үөрэтэр кафедра преподвателигэр Наталия Макароваҕа уонна куурус уус-уран салайааччытыгар, РФ норуодунай артыыскатыгар Людмила Титоваҕа «СӨ искусствотын үтүөлээх деятелэ» аат иҥэриллибитин туоһулуур бэлиэни, сибэкки дьөрбөтүн туттарда.
Маны тэҥэ училище кэккэ педагогтарын үлэлэрэ эмиэ бэлиэтэннэ. Наҕараадаламмыттар ааттарыттан Наталия Макарова олус истиҥник махтанан тыл этиитин саала ытыс тыаһынан көрүстэ. Ол кэннэ төрөппүттэр, аймахтар, доҕоттор үөрэн-көтөн, долгуйан туран араас өҥүнэн кыыһар сибэкки дьөрбөлөрүн туттарыыларынан искусство киэһэтэ түмүктэннэ.
Елена Сыроватская, «Мүрү саһарҕата» хаһыат
