28 тыһыынча кэриҥэ сайабылыанньа Саха сиригэр «Уһук Илиҥҥи гектар» бырагырааманан сири ылыыга киирдэ. Ол туһунан сир сыһыаннаһыыларыгар миниистири солбуйааччы Нюргустана Пахомова Якутия 24 телеханаалга «Актуальное интервью» биэриигэ эттэ.
«Уһук Илиҥҥи уокурукка Саха сирэ сайабылыанньа биэриитигэр иккис миэстэлээх, онтон дуогабар баттаһыытыгар — бастакы. Бүгүҥҥү туругунан 27 943 сайабылыанньа киирдэ уонна 11 543 дуогабарга илии баттанна. Ол иһиттэн 245 дуогабар уларытан сурулунна: 15 арендаҕа, 230 — бас билиигэ. Быйыл сири бас билиигэ 3,5 тыһыынча сайабылыанньаны былаанныыбыт», — диэтэ Нюргустана Пахомова.
Кини бэлиэтээбитинэн, Саха сирин олохтоохторо «Уһук Илиҥҥи гектарга» сүрүннээн тыа хаһаайыстыбатынан дьарыктанаары ылаллар.
