Өрөспүүбүлүкэ сүүмэрдэммит хамаандата Уһук Илиҥҥи бокс күрэхтэһиитигэр 13-14 саастаах уолаттар ортолоругар икки кыһыл көмүс мэтээли ситистэ. Ону тэҥэ, саха боксердара биир үрүҥ көмүс уонна үс боруонса мэтээли ыллылар, диэн СИА кэпсиир.
Күрэхтэһии финалыгар чаҕылхай киирсиини Саха сириттэн Тимур Дюжев (42 кг) көрдөрдө, кини Приморскай кыраайтан Роман Степкины кыайда. Оттон Арий Иванов 52 киилэҕэ диэри ыйааһыҥҥа Амур уобалаһыттан Алексей Бянкины кыайда. Саха сирин эдэр боксердара иккиэн кыһыл көмүс мэтээллэри аҕаллылар.
Саха сириттэн үһүс финалиһынан Мичил Егоров (57 кг) буолла, кини тэҥ киирсиигэ Амур боксерыгар хоттордо. Ренат Эшдавлатов (46 кг), Эрчимэн Слепцов (52 кг), Павел Черданцев (54 кг) боруонса наҕараадалары туттулар.
Благовещенскайга күрэхтэһии Уһук Илин регионнарыттан 157 кыттааччыны муста. Кыайыылаахтар Арассыыйа күрэхтэһиитигэр кыттар быраабы ыллылар. Күрэхтэһиигэ «Азия оҕолоро» норуоттар икки ардыларынааҕы спортивнай оонньууларга кыттыбыт боксердар кытыннылар. Оонньуулар Дьокуускайга кэлэр сылга ыытыллыахтара.
This post was published on 21.03.2023 18:05 18:05