Быыбар киин хамыыһыйата кулун тутар 18 күнүгэр буолбут уочараттаах мунньаҕар Уһук Илиҥҥэ босхо сири түҥэтии сокуонуттан Саха сирин таһаарары туруорсар көҕүлүүр бөлөҕү регистрациялыыры аккаастаата.
«РФ уонна Саха сирин сокуоннарын быһыытынан референдуму ыытар туһунан этии ылыныллыбат. Тоҕо диэтэххэ, Уһук Илиҥҥэ сири босхо биэрии сокуона ылылла илик, Госдумаҕа бастакы ааҕыыны саҥа ааста», – диэн Быыбар киин хамыыһыйатын оробуочай бөлөҕүн бэрэстэбиитэлэ Екатерина Андреева эттэ.
Тэрийэр бөлөх алта чилиэнэ официальнайдык регистарцияламмыт уонна олорор сирдэрэ араастаһар эбит. Ити араастаһыы — аккааска сокуоннай төрүөт.
Санатар буоллахха, олунньу 24 күнүгэр уопсастыбаннас бэрэстэбиитэллэрэ өрөспүүбүлүкэтээҕи реферндуму тэрийэргэ көҕүлүүр бөлөҕү регистрациялыыр туһунан сайабылыанньаны Быыбар киин хамыыһыйатыгар биэрбиттэрэ. Кулун тутар 4 күнүгэр докумуоннара ситэритэ суох буолан, регистарциялааһыны эмиэ ааспатаҕа.
Тэрийэр бөлөх Уһук Илиҥҥэ босхо сири түҥэтиигэ Саха сирин олорчу таһаарары туруорсар.
This post was published on 18.03.2016 14:02 14:02