Саха сирин суол хаһаайыстыбатын миниистирэ Владимир Сивцев сэтинньи 11 күнүгэр Хатас – Павловскай учаастагар Өлүөнэ өрүһү туоруур муус суолу тэрийии үлэтин көһө сылдьар иниспиэксийэтин ыытта. Бу туһунан биэдэмистибэ пресс-сулууспатыгар иһитиннэрдилэр.
Көрүү түмүгүнэн, хамыыһыйа муус туруга былааннаммытыттан эрдэ – ахсынньы бастакы декадатыгар туорааһыны арыйар кыаҕы биэрэрин эттэ. Ол эрээри бүтэһик болдьохтор аллараа температура көрдөрүүтүттэн уонна муус туругуттан тутулуктаахтар.
Билигин Павловскай сэлиэнньэ өттүттэн Өлүөнэҕэ киирэр суоллары уонна ыйааһыны хонтуруоллуур былаһаакканы тупсарыы түмүктэннэ. Уос-Кумах арыыга трасса оҥоһулунна, билигин кураанах кумаҕы уунан кутуу бара турар.
Ордук уустугунан Хатас сэлиэнньэтин өттүттэн Өлүөнэ өрүс фарватер зонатын киллэрэр учаастага буолар. Муус туруута уһаабытынан, муус халыҥа билиҥҥитэ суол техникатын туһанарга сөптөөх халыҥы ыла илик. Эбийиэккэ 17 киһи үлэлиир, кинилэр мэһэйдэри илиинэн туораталлар уонна мотопомпа көмөтүнэн мууһу халыҥаталлар. Күннэтэ мууһу кээмэйдииллэр.
Хатас сэлиэнньэтин өттүгэр туоруур суол уларыйда. Ол түмүгэр уһуна 900-тэн тахса миэтэрэ уһаата.
«Уопсайынан, муус суолун оҥоруу усулуобуйата улаханнык уларыйда, арыы учаастактарыгар үгүс сирдэригэр биэрэк алдьанарын бэлиэтиэххэ наада. Төһө кыалларынан ахсынньы саҕаланыар диэри муус суолу арыйыыны түргэтэтиэххэ наада, ити болдьохтор өр сыллаах орто көрдөрүүгэ сөп түбэһэр. Сакаасчыкка уонна бэдэрээттэһэр тэрилтэлэргэ муус халыҥын динамикатын күннэтэ кэтээн көрүүнү ыыталларыгар уонна куттал суох буолуутун дьаһалларын тутуһан толоруллар үлэни дьаныардаахтык хааччыйалларыгар сорудахтаатым», — диэн Владимир Сивцев быһаарда.
Муус суоллар официальнай арыллыыларын иннинэ мууска тахсыы кытаанахтык бобулларын Саха сирин тырааныспар министиэристибэтэ санатар.
