Дьокуускай — Аллараа Бэстээх паром сырыытын алтынньы бүтүүтүгэр сабар былааннаахтар. Күн-дьыл усулуобуйатын уонна ууга быһыыны-майгыны учуоттаан, болдьох уларыйыан сөп, диэн алтынньы 9 күнүгэр Саха сирин тырааныспар уонна суол хаһаайыстыбатын министиэристибэтигэр иһитиннэрдилэр.
«Билигин гидрологическай быһыыны-майгыны, айылҕа-килиимэт усулуобуйатын олоҕуран, Дьокуускай — Аллараа Бэстээх паром сырыыта алтынньы бүтүөр диэри үлэлиирэ былааннанар», — диэн суруллар биэдэмистибэ иһитиннэриитигэр.
Билигин Дьокуускай уонна Аллараа Бэстээх икки ардыгар паром сырыыта сайыҥҥы кыраапыгынан үлэлиир. Министиэристибэ иһитиннэрэринэн, маршрутка 13 паром сылдьара.
«Паромнар расписаниены тутуһаллар. Уочарат үөскээтэҕинэ, күүһүрдүллүбүт үлэҕэ көһөр. Куттал суох буолуутун үрдэтэр сыалтан, ГИБДД патруллара тэриллэллэр», — диэн биэдэмистибэҕэ бэлиэтээтилэр.
Росморречфлот быһаарыытынан бу хайысханан навигация алтынньы 16-18 күннэригэр диэри уһуон сөп эрээри, күн-дьыл туругунан уларыйыан сөп, диэн бэлиэтиир министиэристибэ.
Сайыҥҥы навигация түмүктэниэр диэри Саха Сирин Госкомцен туруорбут тарыып оннунан хаалар. Тымныы саҕаланыаҕыттан уонна муус туруутун кэмигэр өҥө сыаната уларыйан, сезоннааҕы тарыыпка көһүөҕэ, диэн биэдэмистибэҕэ эттилэр.
