3 От ыйа 03.07
  • -7°
  • $ 104,68
  • 115,6

Тылгыныга "Ыччат сыла" биллэриллэн, саҥа бырагыраама далааһыннаах үлэтэ саҕаланна

Барыга бары талааннааах, мындыр өйдөөх, тобуллаҕас толкуйдаах, элбэҕи эрэннэрэр ыччаттаах Тылгыны нэһилиэгэр 2022 сылы «Ыччат сылынан» биллэриллибитэ. Ол туһунан дьаһалы нэһилиэк баһылыга уонна нэһилиэк депутаттара биир санаанан бигэргэппиттэрэ. Билигин араас таһымнаах айымньылаах үлэ ыытыллар.

Тылгыныга ыччаты өйүүр араас бырагыраамалар баһылык Егор Иванов тус салайыытынан, этиитинэн ситиһиилээхтик үлэлии тураллар. Ол курдук 2020 сылтан эдэр ыаллар нэһилиэк иһигэр дьиэ тутталларын өйүүр анал бырагыраама үлэлиир. Икки сыл устата эдэр ыччат төрөөбүт дойдуларыгар олохсуйан, үлэлээн-хамсаан, төрөөбүт нэһилиэктэрин сайыннараары, дьиэ уот тутуннулар. Олохтоох дьаһалта сүрүн сыалынан, тырымнас уоттардаах Тылгыны нэһилиэгэр ыччаты олохсутуу буолар. Бырайыак 2026 сылга диэри үлэлиэхтээх.

«Ыччат сылынан» 2022 с. нэһилиэккэ төрөөбүт оҕоҕо олохтоох бюджеттан 50 тыһыынча солкуобайдаах анал көмө Бүлүү улууһугар бастакынан биһиги нэһилиэкпитигэр олохтонно. Онон быйыл төрөөбүт кырачаан оҕолорго Саха Өрөспүүбүлүкэтин Ил Дарханын «Үйэ оҕолоро» этиитинэн, 100 тыһ смолк көмө бэриллэрин сэргэ, биһиги нэһилиэкпит оҕолоро эбии 50 тыһ солк көмөнү ылыахтара. Бу буолар буоллаҕа, ыччаты өйөөһүн, нэһилиэккэ ыччат олохсуйуутугар күүс-көмө, өйөбүл буолуу.

Ыччат сылыгар анаан баһылык Егор Иванов сорудаҕынан, 2022 сылтан анал Ыччат бырагыраамата үлэлээн эрэр. Ол курдук, аҕыйах дохуоттаах, саҥа дьиэ туттубут эдэр ыалга анал көмө иккис этааба үлэлиирин туһунан үөрүүлээх сонун ыччаттары олус долгутар. Бу көмө суумата — 50 тыһыынча солкуобай, араас хайысхаларынан тыырыллан, дьиэ-уот туттар эдэр ыалларга ананыаҕа.

Тылгыны ыччата олус көхтөөх, барыга бары кыттар, чөл олоҕу тутуһар, спордунан дьарыктанар. Нэһилиэк үгүс тэрилтэлэригэр ыччат дьон үлэлииллэр-хамсыыллар. Араас култуурунай, спортивнай, үөрэх эйгэтин тэрээһиннэригэр, куонкурустарыгар ыччат өрүү инники сылдьар, күүс-көмө буолар. Тылгынытааҕы «Түһүлгэ» сынньалаҥ киин иһинэн, «Түҥ саһарҕата» үҥкүү ансаамбылыгар, «Нарыйа», «Уолан» ырыа ансаамбылларыгар эдэрдэр кэрэни кэрэхсээн, имигэс үҥкүүлүүн доҕордоһон, ыллам ырыалыын эйэргэһэн, иллэҥ кэмнэрин атаараллар, араас куонкурустарга кыттан, дойдуларын аатын ааттаталлар, кыайаллар-хотоллор.

Ааптар: Виталина Григорьева, «Олох суола» хаһыат

Следите за самым важным и интересным в Telegram-канале и WhatsApp-группе ЯСИА
0
0