Өрөспүүбүлүкэ Үөрэҕин уонна наукатын министиэристибэтэ Оҕо саас сылыгар туһуламмыт айымньылаахтык үлэлиир уһуйааннар кэлэктииптэрин быһаарар уонна көҕүлүүр инниттэн, оскуола иннинээҕи үөрэхтээһин тиһигэр ситиһиилээхтик үлэлиир инновационнай уопуту тарҕатар педагогтар үлэлэрин таһымын үрдэтэр сыалтан сыл аайы ыытыллар «Тыа сирин бастыҥ уһуйаана-2024» кэтэхтэн куонкуруһу биллэрдэ. Ол туһунан «Саха сирэ» саайт суруйар.
Манна тыа сиригэр оскуола иннинээҕи саастаах оҕону иитэр үөрэхтээһин тэрилтэлэрэ кытталлар. Күөн-күрэс үс сүрүн хайысханан ыытыллар:
- Оскуола иннинээҕи саастаах оҕону иитиигэ федеральнай үөрэх бырагырааматын олоххо киллэриигэ үлэ бастыҥ уопута.
- Тыа сирин уһуйаана оскуолаҕа киириэн иннинээҕи саастаах оҕолору кытта коррекция үлэтин тэрийиитэ.
- Саха тылын уонна хотугу төрүт олохтоох омуктар тылларын харыстыыр, сайыннарар үлэ бастыҥ тэрээһинэ.
Матырыйааллары кэмигэр туттарбыт уонна саамай элбэх баалы ылбыт оскуола иннинээҕи саастаах оҕону иитэр уһуйаан «Тыа сирин бастыҥ уһуйаана-2024» куонкурус тэрийэр кэмитиэтин аатыгар сайаапка биэрэн, куонкурус кыайыылааҕынан буолар кыахтаах. Кыайыылаахтарга «Тыа сирин бастыҥ уһуйаана-2024» аат иҥэриллэр, кинилэр кырааматаларынан уонна сыаналаах бэлэхтэринэн наҕараадаланаллар, эбии номинацияларга эмиэ бэлиэтэниэхтэрэ.
Куонкурус түмүгэ 2024 сыл балаҕан ыйын 27 күнүгэр Оскуола иннинээҕи саастаах оҕону иитии үлэһитин күнүгэр үөрүүлээх тэрээһиҥҥэ биллиэҕэ.
Күрэхтэһиигэ кыттарга тэрийэр кэмитиэккэ бу форманан кыттар туһунан сайаапканы олохтоох бэйэни салайыныы уорганын 2024 сыл атырдьах ыйын 15 күнүгэр диэри dosh_mo_otdel@mail.ru ыытар. Билсэр төлөпүөн: 8(4112)61561, 89991745113 .
2024 сыл атырдьах ыйын 15 күнүттэн атырдьах ыйын 31 күнүгэр диэри оскуола иннинээҕи үөрэх кыһата оскуола иннинээҕи үөрэх кыһатын саайтыгар куонкурус матырыйаалларын бэчээккэ таһаарар.
2024 сыл балаҕан ыйын 1 күнүттэн сэтинньи 15 күнүгэр диэри – дьүүлүүр сүбэ куонкурус сайаапкаларын көрөр, куонкурус кыайыылаахтарын туһунан быһаарыыны ылынар.
This post was published on 13.08.2024 13:56 13:56