Нам улууһуттан английскай тыл учуутала Дмитрий Местников үөрэхтэрин бүтэрбит эдэр дьону хайдах тыа сиригэр олохсутан, үлэлэтиэххэ сөбүн туһунан «Инникини түстүүр идиэйэлэр» III Николаевскай пуорум панельнай сиэссийэтигэр ыйытта, суруйда Саха парламент саайт.
Кини нэһилиэктэргэ аныгы олоххо эппиэттиир инфраструктура, социальнай хааччыллыы, аспааллаах көнө суол суоҕун аҕынна. Ону пуорумҥа мустубут кыттааччылар сэргээн, дохсун ытыс тыаһынан көрүстүлэр.
Ил Түмэн Бэрэссэдээтэлэ Алексей Еремеев Нам улууһа киин улуустар ахсааннарыгар киирэрин, Дьокуускай куораттан 80-ча км. сиргэ сытарын, өрүс уҥуор баар нэһилиэктэргэ төгүрүк сыл сылдьар суол-иис суоҕун чопчулаата.
«Өссө Сэбиэскэй кэмтэн суол-иис кыра-кыралаан оҥоһулла сатыыр эрээри, ситэ кыайтара илик. Бэлиитик быһыытынан кураанаҕы дойҕохтообоппун, суоҕу эрэннэрбэппин, онон кэлэр сылларга суол-иис барыта оҥоһуллуо диэбэппин. Суол-иис пуондатыгар үп-харчы тиийбэт, өрөспүүбүлүкэ хорук тымырдара, муниципальнай суоллар өрөмүөннэниэхтээхтэр», — диэн бэлиэтээтэ Алексей Ильич.
Оттон ыччаты тыа сиригэр хайдах олохсутуохха сөбүй диэн ыйытыкка дьиэ кэргэнин, үс оҕолооҕун, икки кыыстааҕын, биир уоллааҕын туһунан билиһиннэрдэ. Кыргыттар Москубаҕа күн сирин көрбүттэрэ, уол Дьокуускайга. Биир кыыстара куорат бэлэмигэр улааппыт, «Сахатранснефтегазка” сүрүннүүр юрист эрээри, күнүн-дьылын офиска бараабакка, тыа сиригэр тахсан олохсуйуон, өбүгэ төрүт дьарыгынан дьарыктаныан баҕарарын туһунан этэр эбит. Онон тыа сиригэр тардыһар эдэр дьон бааллар, кинилэр баалларын тухары үрүҥ илгэ үрүлүйэ сүүрүө, удьуор утума салҕаныа диэн эрэл баар.
Бу сытыы боппуруоһу иилэ хабан ылан Егор Борисов урукку сылларга Тыа хаһаайыстыбатын миниистиринэн үлэлээбитин, бу салаа ис-тас кыһалҕатын барытын билэрин эттэ.
«Миигиттэн ирдииллэр, ардыгар хомуруйаллар этэ. Мин тыа дьонун күннээҕи кыһалҕатын чугастык ылынан үлэлээбитим. Ыччат тыа сиригэр барыан баҕарабатын сүрүн төрүөтэ диэн төрөппүттэр хара сарсыардаттан ойон тураат, олохторо ыараханын, тыа хаһаайыстыбатыгар баар бүппэт кыһалҕалары, харчы тиийбэтин эрэ ырыталлар. Күн аайы ону ыас оҥостоллор, кэпсэтэр тиэмэлэрэ ол эрэ.
Ону көрө-истэ сылдьан оҕолор куоракка үөрэнэн баран хайдах тыа сиригэр эргиллэн кэлиэхтэрэй? Ити бастакы биричиинэ.
Иккиһинэн, дьон күнү супту хотоҥҥо үлэлииллэр уонна харчы диэни ылбаттар, социальнай көмүскэллэрэ суох.
Күн бүгүн биһиги төрүт култуурабыт, өбүгэ үгэһэ, норуот быһыытынан уратыбыт барыта тыа сирин кытта быстыспат ситимнээх. Онон тыа сирин престиһин көтөҕөргө тустаах үлэ ыытыллыахтаах. Манна ыраас чэбдик салгын, ийэ айылҕабыт, булт-алт барыта баар.
Тыа сирин бүгүрү үлэһит киһитэ эти-үүтү туттарда даҕаны, харчытын утары ылан иһиэхтээх. Урбааҥҥа тирэҕирэн, дьон дохуоттаныахтаах, ыйга 200-300 000 солк. ыллаҕына ким тыа сиригэр үлэлии барыа суоҕай?», — диэтэ Егор Афанасьевич.
Кини урут мас оскуола эргэрдэ-эмэҕирдэ диэбиттэригэр үгүс улуустарга толору хааччыллыылаах саҥа оскуолалары-уһуйаааннары тутан биэрбиттэрэ билигин онно үөрэнэр оҕо суоҕун аҕынна.
Сыл-хонук баран истэҕин аайы, тыа сиригэр аныгы дьиэ-уот, суол-иис, инфаструктура барыта оҥоһуллуо, онон тулуйа түһүөххэ наадатын, бу тиийбэт, ол суох диэн аҥаардастыы көрдүү олорор табыгаһа суоҕун бэлиэтээтэ. Эдэр ыччат төрөөбүт дойдутун хайдах баарынан таптыахтаах, бэриниилээх буолуохтаах, ыарахаттары тулуйа үөрэниэхтээх диэн сүбэлээтэ.
Василий Кононов хаартыскаҕа түһэриитэ.
This post was published on 09.10.2025 14:33 14:33