Ааспыт өрөбүллэргэ Дьокуускайга архитектура уонна дизайн эйгэтигэр бастакы өрөспүүбүлүкэтээҕи «Эйгэ» бириэмийэни туттардылар. Үөрүүлээх тэрээһиҥҥэ Саха сирин биллэр архитектордара, блогердар, суруналыыстар кыттыыны ыллылар. Бириэмийэ гран-при хаһаайынынан Горнай улууһун хамаандата буолла уонна 10 мөл солкуобай суумалаах субсидия ылла, диэн СИА кэпсиир.
Кыайыыны ситиспит Горнай улууһун дизайн-код бырайыага элбэх киһи сыралаах үлэтин түмүгэ буолар. Холобур, куонкурус ирдэбилинэн хас биирдии дизайн-код туспа видеолаах буолуохтаах. Онуоха, бу ирдэбилин толорорго Айталина Санникова салайааччылаах “Горный-медиа” диэн айар дьоҕурдаах кулууп кыттааччылара ылсан үлэлээбиттэр.
“Төрөөбүт улууһум сайдар, киэркэйэр. Дьон олорор сирэ табыгастаах буоларыгар үгүс кэскиллээх үлэ ыытылынна.Кылаабынайа, бу бырайыактарга нэһилиэнньэ кылаата баар, олохтоохтор санаалара учуоттанна. Тыа сирэ куораты кытары тэҥҥэ сайдар усулуобуйата тэрилиннэ”, — диэн П.Д.Аввакумов аатынан киин библиотека инновационнай үлэҕэ библиотекара Айталина Санникова санаатын үллэстэр.
Куонкуруска аналлаах видеону Сайан Румянцев, Роман Дмитриев, Айгына Попова, Алина Яковлева, Александра Никифорова уонна Айталина Санникова буолан устубуттар.
“Нэһилиэк баһылыгын солбуйааччы Ксения Васильева устар-айар дьону түмэн үлэбитин сүрүннээбитэ. Мин уоппускам кэмэ түбэһэн, ыкса ылсан үлэлэспитим: сценарийын, таҥыытын бэйэм оҥорбутум. Видеону устуу мин хоббим буолар, тэттик роликтары оҥоробун. Бэйэм аҕыс сыл НВК филиалыгар редакторынан, режиссерунан үлэлээбитим. Билигин “Горный-медиа” кулууп тэрийэн биир интэриэстээх дьону түмэн семинардары, маастар кылаастары ыытабыт”, — диир Айталина Николаевна.
Санатан эттэххэ, «Эйгэ» архитектурнай бириэмийэҕэ өрөспүүбүлүкэ 100 сылын көрсө Саха сиригэр тутуллубут 100 суолталаах эбийиэктэр номинацияланнылар. Сайаапкалары 42 нэһилиэк, ол иһигэр икки куорат уокуруга биэрдэ. Экспертнэй дьүүллүүр сүбэ уон номинацияҕа кыайыылаахтары быһаарда. Кыайыылаахтарга хас биирдиилэригэр профессиональнай уопсастыба билиниитин бэлиэтин быһыытынан статуэтка туттардылар.
Горнай улууһун баһылыга Никита Андреев бэлиэтээбитинэн, бэриллибит 10 мөл. солкуобай субсидияҕа Бэрдьигэстээххэ бырааттыы Даниловтар ааттарынан сквер тутуллуоҕа.
Хаартыска: Мария Васильева, СИА
Видео: Айталина Санникова
This post was published on 05.12.2022 15:01 15:01