Ил Түмэн XIV (уочараттаах) пленарнай мунньаҕар көрүллүбүт «Саха Өрөспүүбүлүкэтин 2026 сылга уонна былааннанар 2027-2028 сылларга судаарыстыбаннай бүддьүөтүн туһунан» Саха Өрөспүүбүлүкэтин сокуонун барылыгар норуот дьокутааттара бастакы ааҕыыга «Тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетун итиэннэ ас-үөл ырыынагын сүрүннээһин» судаарыстыбаннай бырагырааманан үбүлээһин кээмэйин аччаппат туһунан бигэ быһаарыыны ылыннылар.
Инньэ гынан, кэлэр 2026 сылга тустаах бырагыраама дьаһалларын олоххо киллэриигэ көрүллэр үп быйылгы таһымынан хаалларыллыаҕа. Бу туһунан Ил Дархан Айсен Николаев өссө эрдэ, Ил Түмэн салалтатын уонна сис кэмитиэттэр бэрэссэдээтэллэрин кытары оробуочай көрсүһүүтүгэр этэн турар, суруйда Саха парламент саайт
– Быйыл, 2025 сылга, «Тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетун итиэннэ ас-үөл ырыынагын сүрүннээһин» судаарыстыбаннай бырагыраама дьаһалларын олоххо киллэриигэ 14,5 миллиард солкуобай харчы көрүллүбүтэ. Үүнэр 2026 сылга бырагыраама ис тутулун үчүгэйдик ырытан көрөн-истэн баран, үбү-харчыны ордук көдьүүстээх түмүктээх, таһаарыылаах үлэлээх-хамнастаах бырайыактарынан тыырыллыаҕа, ону таһынан, федерацияттан эбии харчыны тардарга улахан болҕомто ууруллуоҕа, – диэтэ үп миниистирин эбээһинэһин толорооччу Иван Алексеев.
Сүрүн өйөбүл сүөһү иитиитин сайыннарыыга, агробырамыысыланнай комплекс үлэтин-хамнаһын уопсай усулуобуйатын тэрийиигэ, ол иһигэр, улуустары өйөөһүҥҥэ, тыа хаһаайыстыбатын управлениеларын итиэннэ хотон-хонуу үлэһиттэригэр оҥоһуллар өҥөлөр хаачыстыбаларын үрдэтэр инниттэн бэтэринээринэй сулууспа үлэтин хааччыйыыга көрүллүөҕэ. Онон, агробырамыысыланнай комплекс эйгэтигэр өрөспүүбүлүкэ бүддьүөтүн стратегията судаарыстыба өйөбүлүн көдьүүһүн үрдэтэргэ туһуланыаҕа, ити төрүт салаалары салгыы сайыннарарга бөҕө тирэх буолуоҕа.
