Ил Түмэҥҥэ «Саха Өрөспүүбүлүкэтин 2026 сылга уонна 2027 уонна 2028 сыллар былааннаах кэмнэригэр судаарыстыбаннай бюджетын туһунан» сокуон бырайыагын бастакы ааҕыытын чэрчитинэн норуот депутаттара «Тыа хаһаайыстыбатын сайыннарыы уонна тыа хаһаайыстыбатын бородууксуйатын, сырье уонна ас-үөл ырыынактарын бэрээдэктээһин» судаарыстыбаннай бырагырааманы үбүлээһин туруктаах уонна улахан кээмэйин хаалларар туһунан сүрүн быһаарыы ылыннылар.
2026 сылга бырагыраама дьаһалларын олоххо киллэриигэ бүддьүөт уопсай кээмэйэ 2025 сыл дьиҥнээх толоруутун кытта тэҥнэһэр таһымҥа хаалыаҕа. Бу туһунан күн урутаан Саха сирин баһылыга Айсен Николаев өрөспүүбүлүкэ парламенын бастайааннай кэмитиэттэрин салалталарын уонна бэрэссэдээтэллэрин кытта үлэ көрсүһүүтүн чэрчитинэн иһитиннэрдэ.
«Быйылгы, 2025 сылга, судаарыстыбаннай бырагырааманы олоххо киллэриигэ 14,5 млрд солк.кэриҥэ ыытыллар. 2026 сылга тыа хаһаайыстыбатын сайыннарыы бары бырагырааматын ис тутулун оптимизациялааһыҥҥа, саамай көдьүүстээх бырайыактарга түмүллэр туһугар бырайыактарга үбү-харчыны хаттаан тыырыыга, ону тэҥэ федеральнай холбоһуктааһыны көхтөөхтүк тардыыга болҕомто ууруллуоҕа», — диэн өрөспүүбүлүкэ үбүн миниистирин эбээһинэһин толорооччу Иван Алексеев иһитиннэрдэ.
Сүрүн өйөбүл сүөһү иитиитин сайыннарыыга, муниципальнай тэриллиилэри өйөөһүнү киллэрэн туран, АПК үлэлииргэ уопсай усулуобуйаны тэрийиигэ уонна аграрийдар өҥөлөрүн үрдүк хаачыстыбатын тутуһарга сүрүн салайар органнар уонна ветеринарнай сулууспа үлэтин хааччыйыыга түмүллүөҕэ.
Онон өрөспүүбүлүкэ АПК эйгэтигэр кэлэр сылга бюджетнай стратегията судаарыстыбаннай өйөбүл көдьүүһүн уонна сыаллаах-соруктаах буоларын үрдэтиигэ туһуланар, ити Саха сирин агропромышленнай комплексын салгыы туруктаахтык сайыннарыыга бигэ тирэх үөскэтиэҕэ.
This post was published on 23.10.2025 14:13 14:13