“Ааҕар Саха сирэ” бассаап бөлөххө соторутааҕыта бибилэтиэкэрдэр бэйэлэрин харчыларыгар хаһыаты суруталларын туһунан кэпсэтии тахсыбыта. Дьиҥэр, пуондаларын хаҥаталларыгар култуура министиэристибэтэ үп көрөр эбит гынан баран, сахалыы таһаарыыларга сороҕор харчы тиийбэккэ хааларын эттилэр.
«Ааҕар Саха сирэ» бассаап бөлөх аатыттан Ньукулай Павлов-Халан (Бикипиэдьийэ), Валерий Луковцев-Дьурустаан (Айар), Анатолий Слепцов (суруйааччы, хирург), Виктор Борисов («Арассыыйа — Мин устуоруйам» түмэл), барыта 36 киһи 2021 сыл ахсынньы 6 күнүгэр ыҥырыы таһаарда.
«Арай, куоракка олорор тыа дьоно төрөөбүт нэһилиэктэрин бибилэтиэкэтигэр сахалыы таһаарыылары суруттахтарына хайдах буолуой? Тыаҕа күттүөннээх үлэ суох буолбут үйэтигэр сорох дьон хаһыат-сурунаал суруппат буоллулар, бибилэтиэкэҕэ баран ааҕаллар. Бу дьоммутугар көмө буолуохха эрэ. Куоракка баар түөлбэ түмсүүлэрэ (землячестволар) сурутууну бассаабынан сүрүннүөхтэрин сөп курдук«, — диэн Ньукулай Халан санаатын СИА-ҕа эттэ.
Сурутуу электроннай барылынан эмиэ ыытыллар. Ол аата ханна да почтаҕа бара сатаабакка, дьиэҕэр дуу, үлэҕэр дуу олорон көмпүүтэргиттэн эбэтэр төлөпүөҥҥүттэн сурутуоххун сөп. Бибилэтиэкэ аатын уонна аадырыһын билэргэ Бикипиэдьийэҕэ баар испииһэги көрүөххүн сөп. Эбэтэр улуус библиэтиэкэтин саайтыттан булуохха сөп.
Почта дьаһалтатын сурутууга үлэһитэ Бурцева Ньургуйаана этэринэн, тыа бибилэтиэкэтин ханнык уулуссаҕа турарын да этэр, дьиҥэр, булгуччута суох, нэһилиэгин аатын эттэххэ сурутуу тиийэр, аны «до восстребования» да сурутуохха сөп диир, оччоҕо бибилэтиэкэ үлэһиттэрэ почтаттан бэйэлэрэ ылыахтара. Ньургуйаана Кононовна эбэн эппитинэн, быйыл Томпо, Таатта уонна Ньурба бибилэтиэкэлэрэ биир да хаһыакка суруппат туруктаах олороллор.
«Суруппут киһи, төһө сатанарынан, суруппутун туһунан дьоҥҥо биллэрэрэ буоллар диэн санаа баар. Атын дьону көҕүлээн, үтүө холобур буолан. Ол туһунан суруйарга маннык хэштегтары туһаныахха: #ТыаСурутуу #БибилэтиэкэСурутуу«, — диэн Халан бэлиэтээтэ.
Онлайн сурутуу: https://podpiska.pochta.ru/
Ахсынньы 16 күнүгэр диэри чэпчэтиилээх сурутуу буоларын санатабыт.
