Петр Алексеев аатынан уулуссаҕа тутуллар дьиэ кыраныыссатын уларытыыга эрдэ бэриллибит көҥүлү уларыттылар. “ЯкутСтройСити” ХЭТ эрдэттэн тутарыгар анаммыт учаастагар эрэ тутууну ыытар кыахтанна.
Тутар хампаанньа Орджоникидзе болуоссатыгар Петр Алексеев уулуссатыгар элбэх кыбартыыралаах дьиэни тутар. Бэриллибит сир учаастага тиийбэтин көрөн, фирма көҥүллэммит параметртан туораан тахсарга көҥүл көрдөөбүтэ. Тутааччы кыһыл линияттан 2,5 миэтэрэни тахсарга көрдөспүтэ. Бэс ыйын 15 күнүгэр көҥүл ылбыта.
Алтынньы 11 күнүгэр мөккүөрдээх сир учаастагын Дьокуускай куораты сайыннарыыга баһылыгы солбуйааччы Василий Гоголев ыыппыт мунньаҕар дьүүллэспиттэрэ. Көҥүлү биэриигэ куорат олохтоохторун санааларын истибэтэхтэр. Ону сэргэ куораты тутуу сокуоннаһыгар докумуону толорууга кэһиилэр бааллара биллибитэ. Онон тутааччыга эрдэ бэриллибит көҥүлү уларыттылар.
This post was published on 19.10.2018 17:46 17:46