Саха сирин хамаандатын хапытаана Константин Капрынов бырааттыы Хадарцевтар бириистэригэр көҥүл тустууга аан дойдутааҕы күрэхтэһии үрүҥ көмүс мэтээлин ылла. Бу туһунан өрөспүүбүлүкэтээҕи сүүмэрдэммит хамаандалар спортивнай бэлэмнэниилэрин киинигэр иһитиннэрдилэр, диэн ЯСИА суруйар.
Финалга саха бөҕөһө урут икки төгүл атын күрэхтэһиигэ күөн көрсүбүт Дагестантан Европа чемпиона Курбан Шираевы кытары эмиэ кииристэ. Ярыгин турнирыгар уонна Россия чемпионатыгар Капрынов кыайбыта.
Ол гынан баран, бу сырыыга табыллыы утарсааччы өттүгэр буолла. Курбан Шираев 6:2 ахсаанынан кыайыыны ситистэ уонна кыһыл көмүһү ылла. Константин Капрынов хамаандаҕа үрүҥ көмүһү аҕалла.
Санатар буоллахха, Владикавказтааҕы турнир инники түһүлгэлэригэр Капрынов Белоруссияттан Георгий Колиевы (7:5), Кемеровоттан Кирилл Корнеевы (9:0) уонна Азербайджантан Мустафа Ахмедовы (8:0) ахсаанынан кыайбыта.
Ити күрэхтэһиигэ Лев Павлов боруонса наҕарааданы ылла.
This post was published on 03.10.2025 10:26 10:26