Бу күннэргэ эмискэ сылыйан, киин куорат уулуссалара номнуо уунан-чалбаҕынан туоллулар, суруйда Саха сирэ саайт.
Тоҕо эмискэ сылыйбытын биһиги норуот синоптига Тускултан туоһуластыбыт.
— Быйыл кулун тутар, урукку сылларга холоотоххо, улахан тибиитэ-хаһыыта суох чуумпутук ааһан эрэр. Саас киин Арассыыйаҕа эрэ буолбакка, бары эрэгийиэннэргэ 1-2 нэдиэлэ эрдэлээн иһэр диэн буолла. Маннык күнү-дьылы өбүгэлэрбит “саас хара хапсыыр буолан, хаарын-уутун көтүтэр былааннаах” дииллэрэ. Быйыл муус устар эрдэлээн сылыйаары турар. Муус устар бастакы дэкээдэтин кэнниттэн киин, илин эҥээр, соҕуруу уонна арҕаа улуустарга күүстээх ириэһин буолуоҕа. Саас хайдах буоларын муус устар 7 күнүгэр — “Былаҕачыанайап” Таҥара күн, сахалар саамай билгэлиир кэтэһэр күннэригэр билиэхпит. Бу күн хайдах күн буолар да, саас оннук буоларын бу кэнники сыллар бигэргэттилэр.
Дьэ, аны кулун тутар 31 күнүгэр диэри хайдах күн-дьыл буоларын билиһиннэриим. Бу нэдиэлэ бүтүүтүгэр киин уонна илин эҥээр улуустарга хаардаах ардах түһэн, сигирээн буолуоҕа. Күнүс +3-4 кыраадыска тиийэ сылыйар. Бүлүү эҥээр улуустарга эмиэ ардыыр чинчилээх. Онон бастакы ардаҕы быйыл муус устар бүтэһигэр, ыам ыйын саҥатыгар буолбакка, кулун тутар бүтэһик күннэригэр үөрэ-көтө бэлиэтиэхпит. Халлаан бу маннык сылыйыыта Красноярскайтан кэлэр сылаас циклону кытта ыкса сибээстээх, — диэн Тускул санаатын үллэһиннэ.
