Үөһээ Бүлүү улууһун Кэнтик нэһилиэгэр оҕо оонньуур, улахан киһи дьарыктанар «Гармония» тупсаҕай көстүүлээх былаһаакката үлэҕэ киирдэ.
Быйыл өрөспүүбүлүкэбитигэр нэһилиэнньэлээх пууннары тупсарыы сыла биллэриллэн, ол чэрчитинэн элбэх үлэ барар. Ол курдук СӨ Тыа хаһаайыстыбатын министиэристибэтэ нэһилиэнньэлээх пууннары тупсарыы дьаһалларын толорууга куонкурус ыыппытын түмүгэр «Кэнтик нэһилиэгэ» муниципальнай тэриллии активтарын сайаапкатынан, бырайыагы көмүскээн субсидия ылары ситиспитэ.
Олохтоох дьаһалта билигин Тупсарыы сыл үлэтин чэрчитинэн сүрүннээн муниципальнай нэһилиэк иһинээҕи суоллары оҥорууга, уулуссалары сырдатыыга, нэһилиэги ырааһырдыы субуотунньуктарыгар, күөх зона күрүөлэрин саҥардыытыгар о.д.а. үлэлэри күүстээхтик ыытар. Онтон тустаах үп бырайыак быһыытынан нэһилиэк тупсарыытыгар — оҕо оонньуур, улахан дьон дьарыктанар, аныгы тренажердаах «Гармония» былаһаакка тутуутугар ороскуоттаммыта.
Балаҕан ыйын 8 күнүгэр, саҥа былаһаакканы туһаҕа киллэрии үөрүүлээх түгэнигэр СӨ Тыа хаһаайыстыбатын миниистирин солбуйааччы Афанасий Семенов, Үөһээ Бүлүүтээҕи тыа хаһаайыстабатын департаменын начальнига Александр Андреев, Үөһээ Бүлүү улууһун баһылыгын бастакы солбуйааччыта Андрей Неустроев, Үөһээ Бүлүү улууһун баһылыгын солбуйааччыта Сергей Кылбанов, «Туймаада-Лизинг» генеральнай дириэктэрэ Дмитрий Махаров сылдьан эҕэрдэлэрин эттилэр. «Кэнтик нэһилиэгэ» МТ баһылыга Валерий Николаев нэһилиэнньэтин, тэрилтэлэрин түмэн, эдэр көлүөнэ, кэнчээри ыччат тупсаҕайдык олоруу сиэригэр-туомугар үөрэтии чэрчитинэн ыытылларын бэлиэтээтэ, чопчулаан СӨ Тыа хаһаайыстыбатын министиэристибэтигэр махтал тылларын тиэртэ.
Нэһилиэнньэ инники былаана киэҥ. Холобур, инникитин нэһилиэк тас көстүүтүн тупсарарга уонна сайыннарыыга араас бырайыактары олоххо киллэрэргэ былаанныыллар. Бу бырайыактар нэһилиэнньэ олохтоохторугар, ыалдьыттарыгар, ону тэҥэ улуус сайдыытыгар туһуланарын ыйдылар.
