«Тундра» саха анимационнай устуудьуйата «Таҥха» кылгас ойуулук трейлерын таһаарда. Устуудьуйа эрдэ таһаарбыт «Тымныы оҕуһа» уонна «Муҥха» айар көрдөрүүлэрин сүрүн геройдара Айаал, Ньукку уонна саҥа герой Мичил таҥха кэмигэр мистиканы кытта алтыһаллар. Сценаристар этэллэринэн, көрөөччүлэри элбэх динамичнай хартыына уонна саха норуотун үгэһин презентацията күүтэр.
««Таҥха» ыарахан уонна мүччүргэннээх тиэмэ. Сахаларга элбэх мистиканы итэҕэйэр дьон баар, онон кыах баарынан кутталлаах түгэннэри киллэрбэтибит. Холобур, күүстээх иччилээх тыллары туттубатыбыт. Үгэһи тутуһан, кими да куттаабат курдук дьаһанныбыт. Ити эрээри мистика баар буолуохтаах, маны сэргэ күлүүлээх түгэннэр», — бырайыак сценариһа Татьяна Ушницкая эттэ.
«Хас биирдии ойуулукпут Саха сирин кыһынын туһунан кэпсиир, култуура көрүүтүнэн, саха норуотун сүрүгэр иҥэ сылдьарынан. Биһиги устуудьуйабыт миссията — оҕолорго саха култууратын, үгэстэрин, төрөөбүт тылын тириэрдии», — диэтэ маркетинговай дириэктэр Анна Борисова.
This post was published on 20.01.2025 10:02 10:02