«Туймаада» судаарыстыбаннай вокальнай ансаамбыл уолаттарын састааба тэриллибитэ быйыл 20 сылын туолар. Үгэс курдук кинилэр бүгүн, кулун тутар 3 күнүгэр, «Будь со мной» диэн кэнсиэртэрин кэрэ аҥаардарга бэлэх ууналлар.
Кэнсиэри көрсө уонна «Туймаада» ырыаһыт уолаттарын кылгастык билиһиннэрэр санааттан аҕыйах ыйытыкка эппиэттииллэригэр көрдөстүм.
-
- Хантан төрүттээххиний?
- Ансаамбылга кэлбит бастакы күҥҥүн өйдөөн-санаан ыллаххына?
- Ансаамбыл репертуарыттан чахчы бэйэҥ дууһаҕын таарыйар, ханан эмэ олоххор сөп түбэһэр ырыа ханныгый?
- Эн санааҕар ырыаһыт буолбутун ыйаах дуу, ханнык эмэ түгэнтэн дуу?
- Дьиэ кэргэниҥ өйөбүлэ?
- Арассыыйа, омук ырыаһыттарыттан сөбүлүүр ырыаһытыҥ?
- Ырыаһыт киһиэхэ саамай үрдүк наҕараада?
-
Николай РОББЕК
Төрөөбүт дойдум Үөһээ Халыма улууһун Уһун Күөл с. буолар. Уон саастаахпар Муома оройуонун Хонуу бөһүөлэгэр көспүппүт. Орто оскуоланы Муомаҕа бүтэрбитим. Онон, мин икки дойдулаахпын дэнэбин.
Төрдүс кууруска үөрэнэ сырыттахпына, «Туймаада» ансаамбылга вокалистарга кастинг буоларын туһунан биллэрии ыйанан турара. Ону ааҕаат да, «Туймаадаҕа» тиийбитим. Дириэктэр кэбиниэтигэр ыҥырбыттарыгар хамыыһыйаҕа Светлана Иванова, Лина Акимова, Наталья Стручкова олороллоро. Джованни Капуро«О sole mio» уонна Кирилл Герасимов «Сардаана сибэкки» ырыаларын толорбутум. Ыллаабытым кэнниттэн: «Мы Вам перезвоним», – диэбиттэрэ. «Арааһа, киирбэтим быһыылаах», – дии санаабытым. Аҕыйах хонугунан: «Докумуоҥҥун илдьэ кэл, бирикээскин таһаарабыт уонна сарсын гастролга айанныыгыт», – диэн эрийбиттэрэ. Ити курдук, үлэбин саҕалаабытым. Кыра эрдэхпиттэн сөбүлээн истэр «Туймаада» ансаамбылга киирбиппиттэн үөрүүм муҥура суоҕа. Ансаамбыл репертуара, биллэн турар, киэҥ. Онтон мин нууччалыы ырыаны ыллыырбын ордук астынабын. Тоҕо диэтэххэ, хоту улааппыт буоламмын, нууччалыы соҕус иитиилэхпин. Ансаамбылынан ордук сөбүлээн ыллыыр ырыабынан Михаил Улицкай тылларыгар, Родольфо Фальво муусукатыгар «Скажите, девушки» буолар. Төрөппүттэрим, дьонум-сэргэм бары муусукаҕа сыһыаннаахтар. Ол иһин, ырыаһыт буолбутум буолуо. Ону, кырдьык, дьылҕам ыйааҕа буолуо дии саныыбын. Ийэм Сардаана Саввична идэтинэн саха тылын учуутала, кыра эрдэҕиттэн ыллыыр. Аҕам Николай Спиридонович наука үлэһитэ. Сөбүлээн истэр ырыаһыттарым – Муслим Магомаев уонна Лучано Паваротти.
- Ырыаһыкка саамай үрдүк наҕараада – дьон биһирэбилэ.
Андрей ТАРАБУКИН:
Сунтаар улууһун Күндэйэ б. төрөөбүтүм.
Ансаамбылга аан бастаан кэлэрбэр олус долгуйбуппун күн бүгүҥҥэ диэри саныыбын.
Виктор Хон—Омук Уолун тылларыгар, Павел Семенов матыыбыгар «Мин ырыам».
Арааһа, ыйаах буолуо. Тоҕо диэтэххэ, дьонум бары култуураҕа сыһыаннаахтара, кинилэр үлэлэрин-хамнастарын көрө улааппытым.
Кэргэмминээн култуура дьонобут. Онон, оҕолорбут эмиэ култуураҕа, спорка сыһыаннаахтар.
Биири чопчулаан этэр кыаҕым суох, элбэхтэр.
Көрөөччү махтала, таптала, дохсун ытыһын тыаһа.
Илья НИКОЛАЕВ:
Ньурба Маарыттан төрүттээхпин.
Аркадий Алексеев айар бөлөҕөр үлэлии сырыттахпына, Светлана Иванова биир кэнсиэр кэннэ көрсөн: «Ансаамбылга ыллыаххын баҕараҕын дуо?» – диэн ыйытан турардаах. Култуура колледжыгар үөрэнэр кэмнэрбэр ансаамбылынан ылласпыт буолан, элбэх куоласка хайытан ыллыыры сөбүлүүр этим. Биир күн дьиэбэр Андрей Тарабукин кэлэн «биһиэхэ боруобаланан көр» диэбитигэр баран куоласпын иһитиннэрбитим уонна сарсыныгар үлэҕэ киирбитим. Ол күнтэн ыла номнуо 17 сыл ааспыт эбит.
Ансаамбыл репертура сылын аайы кэҥээн, саҥаттан саҥа ырыалар киирэн иһэллэр.
Серафим КСЕНОФОНТОВ:
Сунтаар улууһун Куокуну с. күн сирин көрбүтүм.
Дьиҥэр, кэпсээтэххэ, уһун-киэҥ. Көстүүм кэтэн баран, ох курдук оҥостон, тута Светлана Павловна хоһугар көтөн түспүппүн өйдүүбүн…
Миэхэ «Экчи тыл» диэн ырыа чугас курдук. Ис хоһооно дириҥ, элбэххэ үөрэтэр, төрөөбүт дойдуга тапталы угуттуур.
Оскуолаҕа үөрэнэр эрдэхпиттэн муусукаҕа дьоҕурдааҕым биллибитэ. Онон, ыйааҕым буолуо дии саныыбын.
Дьиэ кэргэним, гастролга барар-кэлэр кэмнэрбэр төһө да суохтаатар, өйүүллэр.
Омук ырыаһыттара Селин Дион, Андреа Бочелли уо.д.а.
Ырыаһыт киһиэхэ, көрөөччүлэриҥ, истээччилэриҥ сыанабыллара, сылаас ытыстарын тыаһа.
Андрей ШАДРИН:
Хаҥалас улууһун Тумул с. күн сирин көрбүтүм.
Аан бастаан кэлбиппэр Светлана Павловна олус элбэх нотаны туттаран кэбиспитин уонна барытын үөрэтэн кэлэрбэр эппитин өйдүүбүн. Ол кэнниттэн нэдиэлэ да буолбакка, гастролга барсыбытым.
Биһиги бары да сүрэхпитигэр чугас, дьон истэн сэҥээриэ диэн, уостан түспэт ырыалары талан ыллыыбыт. Ол иһигэр, саҥа да ырыалар бааллар.
Мин аан бастаан 3-с кылааска «Ньургун Боотур» диэн күрэххэ ыллаабытым. Онно муусукаҕа салайааччыбыт миигин ансаамбылга ылбыта. Ыллыырым ити кэмтэн саҕаламмыта буолуо дии саныыбын. Оскуолабын бүтэрэн, култуура коллеһыгар хоровой отделениеҕа докумуоммун эрэллээхтик туттарбытым. Ырыаһыт буоларбын билбит курдук эбиппин.
Дьиэ кэргэним олус өйүүр.
Баритон куоластааҕым быһыытынан, бастатан туран, Муслим Магомаевы, Дмитрий Хворостовскойу сөбүлүүбүн.
Мин ырыаһыкка саамай үрдүк наҕараада көрөөччүлэр биһирэбиллэрэ, убаастабыллара дии саныыбын.
Валерий РОМЕНСКАЙ:
Үөһээ Бүлүү улууһун Балаҕаннаах с. күн сирин көрбүтүм.
Ансаамбылга аан бастаан кэлэрбэр олус долгуйбутум. Онтон Светлана Павловнаансаамбылга ыларын туһунан эппитигэр, көтүөхпүн кынатым суоҕа эрэ туппута быһыылааҕа…
«Мин ырыам» диэн ырыабыт.
Түгэн син биир үөһэттэн ыйыллыбыт ыйаахха киирэрэ буолуо.
Мин биэс оҕолоох дьиэ кэргэҥҥэ улаханнарабын.
Иван Ребров, liciano Povarotti уо.д.а.
Көрөөччүлэр биһирэбиллэрэ уонна куолас сайдан иһэрэ.
Гаврил ВАСИЛЬЕВ:
Үөһээ Дьааҥы Арыылаах нэһилиэгиттэн төрүттээхпин.
Аан бастаан ансаамбылга киирбит күммэр долгуйа санаабытым. Ол эрэн, «бэйэм идэбинэн баран эрэбин» диэн кыра эрэл кыыма баар этэ. Ылбыттарыгар олус үөрбүтүм.
Ансаамбыл репертуарыттан «Мин ырыам» диэн ырыа ордук сүрэхпэр киирбитэ.
Оҕо эрдэхпиттэн ырыаһыт буолуохпун баҕарар этим.
Муслим Магомаев айар үлэтин кэтээн көрөбүн, сөбүлээн истэбин.
Мин санаабар, көрөөччү ытыһын тыаһа туохтан да ордук.
Күндү көрөөччүлэр, бүгүн, кулун тутар 3 күнүгэр 16.00 уонна 19.00 чаастан Саха цииркэтигэр «Туймаада» ансаамбыл уолаттара «Будь со мной» бырааһынньыктааҕы кэнсиэртэригэр күүтэллэр. Артыыстар эһиэхэ анаан саха, нуучча уонна омук композитордарын бастыҥ ырыаларын толоруохтара.
