Кыһыҥҥы спартакиадаҕа томполор бэйэбит бөлөхпүтүгэр кыайыахпыт диэн тылбытын биэрэн турабыт. Бастыахпыт диэн баран бары түмсэн, кыах тиийэринэн бэлэмнэнэн кытынныбыт уонна 3-с бөлөххө чемпион үрдүк аатын ыллыбыт.
Хамаанда улахан аҥара Мэҥэ Алдан нэһилиэгин бэрэстэбиитэллэрэ. Алдаҥҥа хайыһардьыттар бөлөхтөрүн спорт салаатын начальнига Александр Захаров, Нерюнгрига хоккеистар, сноубордистар, шорт-трек уонна хотугу многоборье кыттыылаахтарын бөлөҕүн «Алроса» спорткомплекс директора Афанасий Саввин салайдылар.
Хайыһардьыттар биатлоҥҥа, спортивнай ориентированиеҕа эмиэ кытыннылар. Сүрүн эрэлбит спорт маастарыгар кандидат, 1-кы кыһыҥҥы спартакиада чемпионката Татьяна Петрова этэ. Томполор кийииппит хамаандаҕа элбэх очкону аҕалла.
Хотугу многоборьеҕа Россия спордун маастара, Саха сирин чемпиона Руслан Ханов спартакиада аһыллыытыгар былаах таһаарыста. Кини иккис буолла, үрүҥ көмүс мэтээлинэн наҕараадаланна.
Хоккеистарбыт уопсай түмүккэ 8-с буоллулар. Кинилэр Илин эҥэр чемпионун – Уус Алдан хамаандатын 5:3 кыайдылар. Хоккейынан утумнаан дьарыктанар Хаҥалас уонна атын оонньооччуларынан күүһүрдүллүбүт Нам курдук улахан улуустар хамаандаларыгар улахан утарсыыны оҥорон, оонньуу кэмигэр инники тахсан, ахсааны тэҥнээн ууга-уокка киллэрдибит. Иккиэннэригэр 3:6 хоттордубут.
Күрэхтэһиигэ сүрүн утралыһааччыларбытынан ыалларбыт – өймөкөөннөр буоллулар. Түмүккэ кинилэри 2 очконан кыайдыбыт.
Бэлиэтээн эттэххэ, хамаандабытыгар биир да туора киһи суох, бэйэбит дьоммут кыахтара баарынан кииристилэр. Бары кэриэтэ эдэрдэр, онон инникитин үүнэр-сайдар кыахтаахтар.
Харчынан көмөнү улуус дьаһалтата (баһылык Георгий Герасимов), Дьокуускайга олорор биир дойдулаахтарбыт оҥордулар. Онон кыайыыга кинилэр кылааттара эмиэ баар.
