21 От ыйа 21.07
  • 25°
  • $ 88,02
  • 96,04

Томпо үөрэҕин үлэһиттэрэ спорду өрө туттулар

15:28, 09 марта 2016
Текст:
Читайте нас на
Яндекс Новости
ЯДВ

Хаандыгаҕа Томпо улууһун үөрэх тэрилтэлэрин күрэхтэһиитэ буолла. Барыта сэттэ хамаанда сэттэ көрүҥҥэ илин-кэлин түһүстүлэр. 


Ытыыга бу көрүҥүнэн утумнаан дьарыктанар Мэҥэ Алдан уонна Кириэс Халдьаайы учууталлара икки бастакы миэстэни ылыахтара диэбиппит да, Үөгэн сүрүн оскуолатыттан кэргэннии Изабелла уонна Аркадий Степановтар чуумпур курдук судургу саанан да ытталлар, сылга биирдэ да күрэхтэстэллэр иккис буоллулар.

Нуучча дуобатыгар уонна саахымакка 3-түү дуосканан оонньоотулар. Мэҥэ Алдан (Иван Дарбасов, Валерий Бубякин, Саргылана Хоноехова) уонна Кириэс Халдьаайы спортсменнара бастакы миэстэни былдьаһар санаалаах кэлбиттэрэ чахчы. Оннук дабуолла, 3-кэ Саһыл оскуолата. Саахымакка Мэҥэ Алдан (Иван Дарбасов, Василий Егоров, Светлана Аввакумова) иннин кимиэхэ да биэрбэтэ. 2-с Арыы Толоон сүрүн оскуолата, 3-с Саһыл оскуолата буоллулар. Бэлиэтээн эттэххэ, 20-лии оҕолоох кыра оскуолаларга, уһуйааннарга үлэһиттэрэ да аҕыйах буолан, хамаанда хомунар уустук. Онон кинилэр кыайыылара өссө суолталаах.

Сахалыы остуол оонньууларыгар (хаамыскаҕа, хабылыкка) Мэҥэ Алдан дьоно эрдэттэн эрчиллибиттэрэ өтөн кыайдылар. Саһыл иккис. Арыы Толоон хамаандата анал оҥоһук хабылыгы харахтаан көрбөтөх дьон, хата, бэйэлэрэ кыһанан оҥостон кэлбиттэр уонна 3-с буоллулар.

Остуол тенниһигэр бу көрүҥүнэн уруккуттан дьарыктанар Светлана Галактионова, Владимир Колмаков уонна эдэр онньооччу Айсен Архангельскай састааптаах Хаандыга бастаата. Үөгэн 2-с, Кириэс Халдьаайы 3-с.

Волейболга финалга Хаандыга уонна Арыы Толоон тахсыбыттарыгар, хаһаайыттар 24:22, 26:24 ахсаанынан кыл мүччү кыайдылар. Кириэс Халдьаайы 3-с буолла.

Дьиҥинэн, Хаандыга хамаандатыгар холбоон 100-нэн үлэһиттээх орто оскуола, гимназия, искусство оскуолатын, оҕо айар киинин, култуурнай-спортивнай комплекс тренердэрэ, үс уһуйаан уонна улуустааҕы үөрэх салаатын үлэһиттэрэ кырата 3 хамаанданы да туруорар кыахтаах этилэр. Ол оннугар тыа оскуолаларын үлэһиттэрэ, куруутун буоларын курдук, ыанар ынахтарын кытта быраҕан кэлбиттэр.

Уопсай түмүккэ Мэҥэ Алдан чемпион, Кириэс Халдьаайы үрүҥ көмүс призер, кинилэртэн биир очконан хаалбыт Арыы Толоон боруонса призер буоллулар.

Следите за самым важным и интересным в Telegram-канале и WhatsApp-группе ЯСИА
Тутаах тыллар