Быйыл Томпо улууһугар тыа сирин олохтоохторо сайын устата 7134 тонна оту уонна 400 тонна сенаһы бэлэмнээтилэр. Онон былаан 102,4 % уонна 100 % туолла.
ТХУ сүрүннүүр специалиһа Ирина Федорова иһитиннэрбитинэн, сүөһү аһылыгын бэлэмнээһиҥҥэ 2016 сыллааҕы республикатааҕы куонкурус түмүгүнэн Томпо оройуона уон хотугу оройуоннар истэригэр 2 миэстэҕэ таҕыста. Бастакы миэстэни орто халымалар ыллылар. Биһиги оройуоммут «Синтай» охсордоох тыраахтарынан наҕараадаланна. Бирииһи Дьокуускай к. Комсомольскай болуоссатыгар ыытыллыбыт республикатааҕы «Атыы-эргиэн — 2016» дьаарбаҥка быыстапкатыгар туттарбыттара.
Маны таһынан республикатааҕы быыстапкаҕа «Томпо» СПК (ф) кыттыыны ылбыта. Коллектив үгэс быһыытынан бэйэтэ оҥорон таһаарар иис бородууксуйатын — унтуулары, билэлэри, паннолары уо.д.а. туруорбута. Биһиги биир дойдулаахтарбыт Саха сирин Арктикаҕа Госкомитетын грамотатынан бэлиэтэммиттэрэ.
This post was published on 14.10.2016 10:10 10:10