Томпоҕо авиатордар уонна суолу тутааччылар олорор Теплай Ключ сэлиэнньэ төрүттэммитэ 75 сылыгар анаммыт тэрээһиннэр буолан аастылар. Эҕэрдэ тыллары СР транспортка уонна суол хаһаайыстыбатыгар миниистирин солб. Сергей Владимиров, Томпо оройуонун баһылыга Георгий Герасимов уо.д.а. эттилэр. Саха сирин Ил Дархана Егор Борисов уонна СР Правительствотын эҕэрдэлэрэ ааҕылыннылар.
Теплай Ключ с. төрүттэниитэ Аҕа дойду Улуу сэриитин кытта ыкса сибээстээх. Чуолаан сэрии сылларыгар «Халыма» массыына суолун тутуутун уонна Аляска-Сибирь салгын трассатыгар анаан аэродрому тутуу чэрчитинэн тутуу учаастага төрүттэмитэ. Бу учаастак кэлин Саха сирин хотугулуу-илин өттүгэр эрэ буолбакка, бүтүн Россияҕа тахсар аартык буолбута. Манна биллиилээх суолу тутааччылар, авиатордар, сибээс үлэһиттэрин династиялара оройуон, республика туһугар үлэлээбиттэрэ. Ааспыт үйэ 50-с сылларыгар социальнай объектар тутуллубуттара: оскуола, балыыһа, кулууп, почта уо.д.а.
Теплай Ключ сэлиэнньэтин дойду, республика уонна оройуон уларыйыылара барыта таарыйбыта. Сэлиэнньэ историятыттан бүтүн оройуон, Саха сирин историятын үөрэтиэххэ сөп: бу ССРС НКВД Дальстройун кэмэ, Таатта оройуонун састаабыттан тахсыы, бөдөҥсүйбүт Томпо оройуонун састаабыгар киирии, туспа Теплай Ключ сельскэй сэбиэтин тэрийии уо.д.а..
Оройуон баһылыга Георгий Герасимов Теплай Ключ с. сирин иэнинэн оройуоҥҥа 2-с миэстэни ылар уонна XXI үйэ саҕаланыытыгар сайдыы саҥа кэрдииһигэр киирдэ диэн бэлиэтээтэ. Орто оскуола саҥа дьиэтэ, саҥа хочуолунай үлэҕэ киирбиттэрэ, элбэх функциялаах киин тутуллар. 2015 с. саахалланар туруктаах дьиэлэртэн көһүрүү программатынан биэс квартиралаах олорор дьиэ тутуллубута, «Халыма» федеральнай массыына суола ааһар киин уулусса асфальтаммыта уонна тупсарыллыбыта.
Бырааһынньык күн сэлиэнньэ олохтоохторугар наҕараадалары туттардылар. СР «Гражданскай килбиэн» бэлиэнэн Теплай Ключ орто оскуолатын алын кылааһын учуутала Светлана Новикова наҕараадаланна, СР Правительствотын махтал суругунан Игорь Ильиных, Людмила Попова бэлиэтэннилэр.
Үбүлүөйгэ анаан Теплай Ключ историятын кэпсиир кинигэ күн сирин көрдө. Автор – историческай наука кандидата, Томпо оройуонун бочуоттаах олохтооҕо Николай Николаев. Киниэхэ нэһилиэк баһылыгын махтал суруга туттарылынна.
Сэлиэнньэ олохтоохторун сыралаах үлэлэрэ бу бэйэтэ история. Үбүлүөйдээх тэрээһини бэлиэтээһин чэрчитинэн атырдьах ыйыгар «Теплай Ключ нэһилиэгин ытык олохтооҕо» аат олохтоммута. Алта киһиэхэ аан бастакынан маннык ааты бигэргэтэр дастабырыанньа туттарылынна. Сэлиэнньэ кырдьаҕас олохтоохторо уонна өр сыл бииргэ олорбут 15 кэргэнниилэр, 14 олоххо көхтөөх көрүүлээх дьахталлар бэлиэтэннилэр.
