Бүгүн Томпо улууһугар киин бибилэтиэкэ, Нам, Өлүөхүмэ, Уус-Алдан Суотту нэһилиэгэр оҕолор бибилэтиэкэлэрэ аһылыннылар. Үөрүүлээх тэрээһин онлайн ыытылынна.
Тэрээһиҥҥэ бырабыыталыстыба бэрэссэдээтэлин солбуйааччытын э.т. Сергей Местников, култуура миниистирэ Юрий Куприянов кытыннылар. Сергей Местников өрөспүүбүлүкэҕэ 501 уопсастыбаннай бибилэтиэкэ баарын, кинилэр ситиһиилэрин кэпсээтэ.
«Быйыл Саха сирэ Арассыыйаҕа бастакытын «саамай ааҕар эрэгийиэнинэн» билиннэ. Маны таһынан Национальнай бибилэтиэкэ бүтүн Арассыыйатааҕы күрэскэ кыайда, оттон Уус-Алданнааҕы киин бибилэтиэкэ иккис миэстэни ылары ситистэ», — диэтэ Местников.
Кини быйыл «Култуура» национальнай бырайыак нөҥүө бибилэтиэкэлэри саҥардыыга 60 мөл солкуобай көрүллэн, 10 SMART-лабораториялаах модельнай бибилэтиэкэлэр үлэҕэ киирбиттэрин эттэ.
Томпотооҕу киин бибилэтиэкэҕэ 1,3 мөл солкуобай, атыттарга 800-түү тыһ. солк. көрүллүбүтүгэр өрөмүөн барбыт, тиэхиньикэ, кинигэ пуондата саҥардыллыбыт.
Саҥардыллыбыт бибилэтиэкэлэргэ ааҕааччылар Интернет көмөтүнэн электроннай өҥөлөрүнэн туһаныахтарын сөп. Манна 3D принтердар, уруучукалар, электроннай конструктордар, виртуальнай ачыкылар бааллар.
