Олохтоох массыынаны сапараапкалыыр ыстаансыйа наадатын Сунтаар оройуонун Тойбохой нэһилиэгин олохтоохторо Саха сирин бырабыыталыстыбатын көһө сылдьар отчуотугар бэлиэтээтилэр. Баар эбийиэк хас да сылы быһа үлэлээбэккэ, онон уматыгынан хааччыллыыга ыарахаттар үөскээбиттэр.
Контейнернай АЗС арыллар кыаҕа көрүллүөҕэ, диэн өрөспүүбүлүкэ гражданскай оборуонаҕа уонна нэһилиэнньэ олоҕун-дьаһаҕын куттала суох буолуутун хааччыйыыга миниистирин солбуйааччы Никита Павлов эттэ. Бу иннинэ сир учаастагын докумуоннарын кытта боппуруоһу быһаарыахха наада, диэн бэлиэтээтэ.
Ону таһынан дэриэбинэҕэ алын кылаас үөрэнээччилэригэр спортивнай саала тиийбэт. Билигин кинилэр олохтоох спортсаалаҕа, физкультуранан дьарыктаналларыгар көҥүллэммэт оҕо дьиэтигэр, үөрэнэргэ күһэллэллэр. Бу боппуруос бырабыыталыстыба отчуотун боротокуолугар киллэриллэр уонна өрөспүүбүлүкэ министиэристибэлэрин таһымыгар көрүллэрэ бэлиэтэннэ.
Итини сэргэ Тойбохой олохтоохторо электричествонан оттук тарыыбын үрдээһинэ, үөрэх эйгэтигэр кадрдары оптимизациялааһын уонна эми-тому хааччыйыыга боппуруостаахтарын биллэрдилэр. Отчуот өссө биир тиэмэтинэн быйыл Саха сирин доруобуйа харыстабылын министиэристибэтин линиятынан саҕаланар эмчит амбулаториятын тутуу буолла.
Сунтаар оройуонугар өрөспүүбүлүкэ судаарыстыбаннай былааһын ситэриилээх уорганнарын отчуота олунньу 16 күнүгэр саҕаланна. Вице-премьер Георгий Степанов салайааччылаах бырабыыталыстыба делегациятыгар үп министирин э.т. Иван Алексеев, доруобуйа харыстабылын миниистирин бастакы солбуйааччы Дмитрий Сергин, үөрэх уонна наука миниистирин бастакы солбуйааччы Ньургун Павлов, өрөспүүбүлүкэ гражданскай оборуона дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистир солбуйааччы Никита Павлов киирдилэр.
Түөрт хонукка бөлөх улуус 20-тэн тахса нэһилиэнньэлээх пуунугар сырытта, оттон чэппиэргэ отчуот Сунтаар сэлиэнньэтигэр буолла.
This post was published on 20.02.2026 14:05 14:05