13 От ыйа 13.07
  • 31°
  • $ 87,74
  • 95,76

Тимир уустара дойду тэбэр сүрэҕэр күрэстэстилэр

17:43, 19 апреля 2018
Текст:
Читайте нас на
Яндекс Новости
ЯДВ

Москваҕа “Сокольники” киэҥ уораҕайыгар “Клинок—традиции и современность” диэн норуоттар икки ардыларынааҕы 37-с быыстапка буолла.


Далааһыннаах түһүлгэҕэ тимир уустара, мастарыскыайдар, фабрикалар, бөдөҥ хампаанньалар мустубуттар. Биһиги өрөспүүбүлүкэбититтэн СӨ Инвестиционнай сайдыы уонна предпринимательство министиэристибэтин, Саха сирин уустарын сойууһун өйөбүллэринэн 10 киһи баран бэйэлэрин үлэлэрин-хамнастарын билиһиннэрдилэр. Бу туһунан биһиэхэ Тааттаттан тимир ууһа Яков Данилов иһитиннэрдэ.

Тэрээһиҥҥэ 28 регионтан, уопсайа 200-тэн тахса киһи муһунна. Бииртэн-биир ураты оҥоһуктары дьон-сэргэ улаханнык кэрэхсээн, сэргээн көрдө иһиттэ. Ыйыталаһааччы, сураһааччы, үлэ үөрүйэҕин атастаһааччы, санаа үллэстээччи, төлөпүөн нүөмэрин ылааччы, атыылаһааччы элбэх буолла.

Түһүлгэҕэ турааччылар быыстапкаҕа аҕалбыт быһахтарын хайдах оҥорбуттарын, туох туһаныллыбытын, бу быһах туохха аналлааҕын, ойуутугар-бичигэр, кыыныгар тиийэ сиһилии кэпсээтилэр, сытыылаан көрдөрдүлэр, — диэн кэпсээтэ. Уран тарбахтаах уус саха быһаҕын дьон-сэргэ ханна да улаханнык сэҥээрэрин итиэннэ атын куораттар уран тарбахтаахтара үтүгүннэрэллэрэ элбээн иһэрин бэлиэтээтэ.

Уустар быһахтарын быыстапкатын, атыытын сэргэ, оҥоһук бастыҥын талар күөн күрэс ыытыллыбыт.  Ол курдук, куукунаҕа туттуллар ортоку, кыра быһахтарга тус-туһунан,  илдьэ сылдьарга табыгастаах аска-үөлгэ туттуллар быһахха,  үлэҕэ-хамнаска, о.д.а. араас хайысхаларынан күрэс ыытыллыбыт. Түмүккэ, “Художественнай оҥоһуктарга” ааттаах-суоллаах уустары кэннилэригэр хаалларан, Александр Данилов (Дьокуускай) 1 миэстэни ылан үөрүү-көтүү өрөгөйө буолбут.  Художественнай гарнитураны көрүү-истии хайысхатыгар Альберт Олесов (Дьокуускай) иккис бочуоттаах миэстэҕэ тахсыбыт. Аска-үөлгэ туттуллар быһахтарга Саха сирин уустарын быһахтарын дэгиттэр диэн ураты үрдүктүк тутан, чорботон бэлиэтээбиттэр. Түмүккэ 1 миэстэни Яков Данилов (Таатта) ылбыт. 2 бочуоттаах миэстэҕэ Павел Константинов (Үөһээ Бүлүү) тахсыбыт. Үһүскэ Эдуард Вырдылин (Таатта) тиксибит.

Манна даҕатан эттэххэ, Яков Данилов бу күрэскэ иллэрээ сыл кыттан, “Сытыы быһахха” үһүс бочуоттаах миэстэни ылан турар. Итиннэ Саха сирин уустара күрэскэ кыайан-хотон күннээн кэлбиттэрэ.

Сардаана БАСНАЕВА, “Саха сирэ” хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА