Булуҥ улууһугар методическай десант үлэтэ салҕанар. Бу сырыыга Тиксиитээҕи 1 №-дээх оскуола алын сүһүөх кылааһын учуутала Яна Ачикасова оскуола, уһуйаан үлэһиттэрин кытта көрүстэ.
Тэрээһин эбии үөрэхтээһин сылын чэрчитинэн ыытыллар. Яна Михайловна оҕо саадын иитээччилэригэр судаарыстыбаннай үөрэҕирии стандартыгар хайдах үлэлиэхтээхтэрин, үөрэх бырагыраамматын хайдах оҥоруохтаахтарын уонна оҕо оскуолаҕа хайдах бэлэмнээх кэлиэхтээҕин сиһилии кэпсээтэ. «Саҥа стандартынан бэһис сылбын үлэлиибин. Урукку кэмҥэ үөрэҕирии управлениетын үлэһиттэрэ бэйэлэрэ эрэ барар эбит буоллахтарына, билигин хас биирдии учуутал тиийэн бэйэтин үлэтин туһунан кэпсиир, билиһиннэрэр, тарҕатар кыахтанна. Методдесант киһитин ахсаана элбиир, улааттар улаатан иһэр. Маннык тэрээһин, биллэн турар, барыбытыгар үчүгэй, туһалаах, учуутал бэйэтигэр саҥаны билэр-көрөр», — диэтэ Яна Михайловна.
Үөрэх хаачыстыбата учууталлар хайдах бэлэмнэнэн кэлиэхтээхтэриттэн чопчу тутулуктаах. Хара-Уулаах уонна Быыкап оскуолаларын учууталлара үөрэнээччилэрин билиҥҥи кэмҥэ эппиэттэһэр тупсаҕай ньымаларынан үөрэтэллэр. Быыкап оҕо саадын иитиллээччилэрэ сайдалларыгар бары усулуобуйа барыта баар, иитээччилэр оҕолорго наһаа үчүгэй дьарыктары ыыталлар. Бу сылга оскуолаҕа бараары бэлэмнэнэ сылдьар бөлөх оҕолоро ыйытыктарга толору эппиэт биэрэллэрэ астыннарда. Үөрэх управлениета сүрүн сыала-соруга – үөрэх хаачыстыбатын үрдэтии. Оҕолор бары оскуолаларын бүтэрэннэр салгыы орто, үрдүк үөрэхтэргэ үөрэнэ баралларыгар учууталлар үлэлииллэр. «Методдесант сүрүн сыала – учууталларга сөптөөх көмөнү уонна үөрэнээччилэргэ, төрөппүттэргэ психологическэй, педагогическэй көмөлөрү оҥоруу. Билигин учууталларга уонна иитээччилэргэ үөрэх хаачыстыбаларын үрдэтии куурустара саҕаланнылар, онон нэһилиэктэр педагогтара Тиксиигэ кэлитэлээн эрэллэр. Бэлиэтээн эттэххэ, бүтэһик десант 5 сыл анараа өттүгэр нэһилиэктэринэн үлэлээбитэ», — диэн улуус үөрэҕириитин управлениетын начальнигын солбуйааччы Агафья Попова кэпсээтэ.
This post was published on 07.04.2016 21:15 21:15