21 От ыйа 21.07
  • 18°
  • $ 88,02
  • 96,04

Тиксии олохтоохторо спорт араас көрүҥнэринэн дьарыктаналлар

11:34, 15 августа 2016
Читайте нас на
Яндекс Новости
ЯДВ

Атырдьах ыйын 13 күнүгэр Дойду үрдүнэн физкультурник күнэ бэлиэтэннэ. Бу күн улахан биһирэбили СССР 20-30-с сылларыгар ыла сылдьыбыт, ол курдук бүгүҥҥү күҥҥэ диэри спортсменнар, спорт эйгэтин үлэһиттэрин бырааһынньыктара эрэ буолбакка, спордунан таптаан дьарыктанааччылар барыларын күннэрэ буолар.


Улуустааҕы “Маяк Арктики” хаһыат кэрэспэдьиэнэ Тиксиигэ дьон ханнык спорт көрүҥүнэн дьарыктаналларын билистэ.

Сүүрүү.

Сүүрүү – саамай боростуой, туһалаах көрүҥ буолар. Манна улахан эрэйэ суох, ханна баҕарар тахсан сүүрүөххэ сөп.

Мария ГУЛЯЕВА: «Биһиги көннөрү бэйэбит туспутугар сүүрэбит. Сүүрүүнэн дьарыкпытын саҕалаабыппыт икки ый буолла, спорт саалатыгар нэдиэлэҕэ үстэ сүүрэбит. Сүүрүү иммунитеты тупсарар, холестерины намтатар уонна ордук хос ыйааһыны суох гынар. Былыргы гректэргэ маннык муударай этии баар: “Күүстээх буолуоххун баҕараҕын – сүүр, кырасыабай буолуоххун баҕараҕын – сүүр, өйдөөх буолуоххун баҕараҕын – сүүр”.

Футбол.

Тиксии бөһүөлэгэр оҕолор, эдэр дьоннор футбол көрүҥүн ордороллоро биллэр, бу туһунан оройуоммутугар ыытыллар араас күрэхтэри сырдатарбыт туоһу буолар.

Юра МОЧЕНКОВ, Арктика гимназиятын 2 кылааһын үөрэнээччитэ: Мин футбол оонньообутум иккис сыла буолла. Биһиги футболтан үөрүү-көтүү ылаары уонна оттон кыайаары оонньуубут. Футбол хонуутугар күн ахсын кэлэбит, күн-дьыл туругуттан иҥнибэппит. Кыһыҥҥы өттүгэр оскуолабыт спорт саалатыгар мээчик тэбэбит.

Велосипед.

Велосипед тэбиитэ сылтан сыл киэҥник тарҕанан эрэр. Бу спорт көрүҥэ улаханыттан, кыратыттан тутуллубат, ким баҕарар дьарыктаныан, тэбиэн сөп.

Василий Ядрихинскай:“Велоспордунан быйыл саҥа дьарыктанным, велосипед чуолаан доруобуйа тупсарарга уонна атах былчыҥын эбэргэ диэн сыаллаах атыыласпытым. Велосипедпын күн ахсын иллэҥ буоллахпына тэбэбин. Туундараҕа, болуотаҕа, хайаларга, барытынан тэппитим. Балыктыы барарга, айылҕаҕа тахсарга олус табыгастаах тэрил”.

Скандинавскай хаамыы

Тиксиигэ кэлиҥҥи кэмҥэ скандинавскай хаамыынан дьарыктанааччы элбээн, үксээн иһэр. Скандинавскай хаамыыны дьон араастык ааттыыр.

Светлана Стручкова: Хаамыынан дьарыктаммытым үһүс сылыгар барда. Бу көрүҥ доруобуйаҕа олус туһалаах диэхпин баҕарабын. Эрдэ мин сүрэҕим ыалдьар эбит буоллаҕына, билигин ыарытыйбат буолла. Маҥнай доруобуйабын көннөрүөм диэн хаамыыбын саҕалаабытым. Күөх экраҥҥа бу көрүҥ доруобуйаҕа олус туһалааҕын туһунан кэпсииллэрин көрбүтүм, ол онтон ыла хаамыахха диэн бөлөх тэриммиппит. Билигин бэһиэ буолан, киэһэ 7 чаастан нэдиэлэҕэ 5-тэ Тиксии бөһүөлэгиттэн туундараҕа тахсан хаамабыт. Хаамыы кэнниттэн киэһэ өттүгэр үөрэ-көтө сылдьаҕын, үчүгэй санаалаах утуйаҕын, сарсыарда эрдэ сэргэхтик уһуктаҕын”.

Баскетбол.

Бу күннэргэ баскетбол көрүҥүн сэҥээрээччилэр Тиксии Севморпуть уулусса 23 нүөмэрдээх дьиэтин аттыгар баскетбол корзинатын туруорбуттара.

Дима Белоногов, Тиксиитээҕи маҥнайгы нүөмэрдээх орто оскуола 9 кылааһын үөрэнээччитэ: “Оскуолаҕа баскетбол 5 кылаастан киирэр. Аан бастаан оонньуурбутугар олус сөбүлээбитим, волейбол даҕаны, футбол даҕаны тэҥнэспэт. Хаһан эрэ, урут бу миэстэҕэ баскетбол корзината эмиэ баара, оччолорго мин кыра оҕо этим. Саҥа баскетбол корзинатын туруорбуттарын истэн наһаа үөрбүтүм. Мантан ыла манна кэлэн оонньуур буолуохпут”.

Следите за самым важным и интересным в Telegram-канале и WhatsApp-группе ЯСИА