Хаҥалас уонна Нам суолугар баар ыйааһыны хонтуруоллуур пуун нуорманы кэһиигэ 1067 уурааҕы таһаарбыт, онтон 186-та эрэ төлөнөн, 66 мөл. солк. харчы киирбит, суруйда Саха парламент.
Ространснадзор начаалынньыгын солбуйааччы Ольга Захарова быһааран биэрбитинэн, өрөспүүбүлүкэҕэ таһаҕас ыйааһынын уонна кээмэйин бэрэбиэркэлээһин түмүгэ Ространснадзор Тверь куораттааҕы Киин салаатыгар тиийэр, кэһии таҕыстаҕына, уурааҕы кинилэр таһаараллар. Биллэн турар, итинник тэрилтэ Уһук Илиҥҥэ баара быдан табыгастаах буолуох эбит.
Ольга Захарова этэринэн, ыстараап суол ханнык эрэгийиэҥҥэ киирэринэн, ол хааһынатыгар төлөнөр. Холобур, «Умнас», «Нам» айан суолугар тутуллар ыстараап өрөспүүбүлүкэ бүддьүөтүгэр киирэр.
Тутуу матырыйаалын оҥоруунан дьарыктанар «Чаттай» ХЭТ дириэктэрэ Евгений Баишев ыйааһыны хонтуруоллуур пууну туруоруохтарыттан хампаанньа 15,5 мөл. солк. суумалаах ыстараабы төлүөхтээҕин туһунан иһитиннэрдэ. Тэрилтэ онуоха сөбүлэспэккэ сууттаһан, Үрдүкү Суукка тиийбиттэрин, онтон сылтаан тутуу матырыйаала номнуо 1,5 % ыараабытын эттэ. Кинилэр «Якутцемент» хампаанньаттан портландсиэмэни таһаллар, бу бытархай матырыйаал төһө ыйааһыны көлүөһэҕэ биэрэрин киһи кыайан чуолкайдаабатын, бытарыйа сылдьар эттик айаҥҥа хамсыырын быһаарда.
