Аҕыйах хонуктааҕыта билэр дьахтарбар, Майа олохтооҕор, телеграм ситимигэр чугастык билэр дьахтара 48 тыһыынча солкуобайы иэс көрдөөн суруйбут, өйүүн төнүннэриэм диэбит, диэн Эркээйи интернет таһаарыы суруйар.
Туохха эрэ наадыйдаҕа диэн тута ыытыан баҕарбыт да, ол кэмҥэ туһааннаах суумата суох буолан биэрбит. Онтон хос-хос суруллубуту ааҕан көрөн баран, урут нууччалыы суруйбат этэ ээ диэн дьиктиргээбит. Бэйэтигэр эрийэн билбитэ, билэр дьахтарын телеграм ситимин түөкүттэр алдьаппыттар (взлом) уонна кини аатыттан бары контактарыгар суруйан харчы көрдөөбүттэр.
Ити курдук, масыанньыктар олус «булугас өйдөөхтөр», боростуой дьону албынныыр бииртэн биир саҥа көрүҥү толкуйдаан иһэллэр. Бу иннинэ телеграм ситимигэр, буолаары буолан билэр киһиҥ аатыттан суруйбуттарын истэ иликпит. Сотору буолаат, биллэн турар, түөкүн суруйбута, ол иһигэр эрдэ бэйэлэрэ суруйсубуттара барыта сүтэн хаалбыт.
Оттон эһиэхэ масыанньыктар төлөпүөннүү сылдьыбыттара дуо? «Сотору-сотору эрийэллэр», –үгүстэр хоруйдара маннык. Ааккынан, аҕаҥ аатынан ыҥыран туран, бэрт эйэҕэстик «баан куттал суох буолуутун сулууспатын эппиэттээх үлэһитэбин» диэн кэпсэтиини саҕалыыллар. Онтон сотору, масыанньык буоларын сэрэйбиккин биллэрдэххинэ, кулгаах тостор быдьар тылынан үөҕэн бараллар.
Ааспыт 2022 с. сыл аҥарыгар тэйиччиттэн буруйу оҥоруу 700-чэ түбэлтэтэ тахсыбыта, оттон быйыл номнуо 951 түбэлтэ бэлиэтэннэ.
Итэҕэйимтиэ уонна түргэнник барыһырыан баҕалаах Саха сирин олохтоохторо масыанньыктар хармааннарын 473 мөлүйүөҥҥэ чугаһыыр солкуобайынан хаҥаппыттар. Ол туһунан Саха Өрөспүүбүлүкэтин Ис дьыалаҕа министиэристибэтин пресс-сулууспатын иниспиэктэрэ Альбина Ушницкая уонна министиэристибэ Мэҥэ Хаҥаластааҕы отделын холуобунай ирдэбилгэ отделениетын начаалынньыга Степан Гермогенов иһитиннэрдилэр.
Эркээйи
This post was published on 25.07.2023 12:04 12:04